mardi 10 mars 2020

ZELEKSION KOLONIAL LO MER DANN KOLONI LARENION BORD ALI

Zélèksion kolonial wa tyinbo dann koloni Larénion dimans 15 mars é dimans 22 mars 2020 zot la vi tout lo bann figaro i antrotien sistinm kolonial dan nout péi lé an papangèr kisoi sat lé anplas dopi in déséni, kisoi  sat i rèv giny in plas bordaz, kisoi bann vié koukou i sort dann fon tiroir i rovien po tas moiyin roprann in plas tout i koz lo minm langaz kontinié aplik politik kolonial lafrans dann nout péi alor lé in propagand an fin vi, lé an fayit, la fine anminm anou dann fon kanal, la tyé tout nout kalité manir viv, la aral anou dan la mizèr,  la fé lo pèp rénioné bann asisté, bann mandian, la fane la violans partou, bétonaz, polision, la drog, lalkol, la mèt domoun atèr dann kazié lapin,somaz, la dévid nout popilasion po anvoy andéor, la diviz anou, zot sistinm kapitalis i fé lanprofitaz si lo kouraz bann travayèr, la tié nout natir, la lès tout kalité maladi rant isi kisoi dann bitasion, lélévaz, dan kor domoun noré ankor po di dosi tout sé bann figaro sèrvitèr lafrans kolonial la mèt nout péi dan lo gran dézèspwar total.

Sakinn po giny zélèksion lo mèr dopi plis 50 tan i arèt pa minm i kontinié bous lo zié lo pèp, po  giny lawa tout moiyin lé bon po zot i done travay, i promé si i rant tout nora in travay la mizèr nora pi, i fé pinik, i done barkèt manzé lakol lavi, i fé zoli manièr an piouk piouk zot minm bondié san konfésion, i done larzan, i pèy faktir, i pèy lwayé i fé tout kalité promès koz pa koman po bann domoun lé atèr i koné bann domoun-là lé dan in gran malizé sosial é fayfay tout kalité zafèr lé bon po taz la gèl po zot giny zélèksion kolonial.

Zot wa di vot po kisa bin na lontan zot i vot na poin aryin la sanzé kontrèr i sabouk azot plis ankor toulézour é lé bana i angrès plis ankor é an figaro i kontinié défann la koloni lé azot pran konsians tank nou sra in péi kolonizé bann zélèksion kolonial frodé wa fout anou dann fon.

Lavnir é lèspoir po domin po zordi minm lé rozoinn Léta Rénioné lo bann zoutiy lé anplas lé anou ansèrv ali po nou fini èk sistinm mafia kolonial lé dan nout péi.

Ala bann zoutiy Léta Rénioné po zot konèt lé anplas dopi 2017

Sit Web Léta Rénioné  : http://www.kontkolonial.org 
Sit Web Gouvernman Kontkolonial  : http://gouvernman.kontkolonial.org 
Sit Web Gran Konsey Kontkolonial :  
http://gran-konsey.kontkolonial.org 
Sit Web Gran Lasanblé Kontkolonial :  
http://gran-lasanble.kontkolonial.org 

Rédaksion Zournal Démaliz – Mars lan 2020 

Blog Zournal Démaliz : 

Paz Facebook Zournal Démaliz :

Po konèt :
Kopiaz roprodiksion intèrdi. 
Si zot i ropran lartik po fé konèt oubli pa di ousa i sort i kont si zot.