jeudi 5 mars 2020

TANSION PANGAR LEPIDEMI COVID 19 LE DOVAN NOUT PORT FO ANDIG ALI AVAN LE TRO TAR

Dopi COVID-19 (CORONAVIRUS) la komans sikoté péi la Sine nou wa zordi la fine ariv dann bonpé péi koman sa léné po linstan bann gran doktèr i koné pa ousa i sort apré na bonpé bat lang i di sa zanimo, la sap dan la min bann laboratoir (bann domoun i travay dosi virus) ou in péi la larg sa i apèl sa in gèr biolozi ou in mal fondé la larg sa na tout kalité kozman i sort sat fo konèt la fine nir in lépidémi mondial é bann lékonomi i komans pran in koutpat é lavi toulézour bann domoun osi. Rovien isi dann nout péi dapré bann zotorité kolonial i di na poin domoun lé kontaminé anparmi nout popilasion mé sat lé grav avan i ariv dovan nout port o lièrk lès domoun fé la loi zot minm létan bann zotorité kolonial i komans protèz nout péi pars an tank koloni nou lé in baro rouvèr kont tout kalité maladi, lépidémi la pi lèr po zot zoué kanèt la sitiasion lé grav fo pran sa an min kontrol sèryé bann domoun i rant isi, bato, laviyon... avan lé tro tar. Zot tout i koné nout péi la touzour giny bann gran lépidémi dan son listoir la grip espaniol mars 1919, la pest, fièv zone, chikungunya 2005, la ding dopi 3 zan bana i ariv pa konbat sa. Alor avan sa i propaz partou dan nout péi fodré pa atann aryink bann zotorité kolonial i di anou kosa fo fé lé anou lo pèp pran anou anmin po protèz anou kont sa wi si fo amont nout kolèr lé lézitim si bann kolonial i bouz pa. Dèrnié nouvèl domoun i komans lafolaz fo konprann azot la pèr i gèt partou mé fo nou ariv kontrol anou pa tonb dan in tousèl po tousèl zistoman kosté ansanm po konbat lépidémi-là.

Rédaksion Zournal Démaliz – Mars lan 2020 - 
http://zournal-demaliz.blogspot.com/
https://www.facebook.com/Zournal-D%C3%A9maliz-492225557533691/ 

Po konèt :
Kopiaz roprodiksion intèrdi. 
Si zot i ropran lartik po fé konèt oubli pa di ousa i sort i kont si zot.