mercredi 18 mars 2020

Papié déplasman po COVID-19

Papié zotorité kolonial la mèt anplas dosi lo web po déplasman domoun bana i kroi tout domoun néna lordinatèr, imprimant, intèrnèt, télé-radio-zournal. Po sat na poin bann zoutiy-là koman zot i fé alé domann siouplé domoun alé war bann biro sosial tout lé fèrmé. Zot té koné lépidémi dopi la komans an 2019 noré ariv to ou tar dovan nout port akoz la pa organiz bien navan ankor in mové lorganizasion gouvèrnman kolonial dan nout péi é bann granmoun i viv tousèl, domoun abandoné sosialman, domoun andikapé, domoun i giny pa ékri é lir zot la mazine bann domoun-là kan nora bézoin sort déor po alé fé sat lé otorizé i fout minm pa konèt bout papié-là kan bann babilone wa kontrol azot wa di zot na poin lo droi sorti é la zot i fout minm pa konèt kosa la ariv azot wa di kèl droi i défann azot sorti (lé sat lé dosi térin i koné lo manir viv lo pèp, sak lé anlèr dann gran biro i fout minm pa konèt réalité vi domoun atèr). Fé tansion lé vré fo protèz nout popilasion apré bann domoun la pa abitié rès anfèrmé la tèt wa bloké sirtou sat i viv dan kazié lapin zot la park domoun dodan. Fotaspéré mézir zot la mèt anplas nora in rézilta po arèt lépidémi é rod in romèd po sa sinon i fé koi. Sat lé sir domoun i sa pa rès ranfèrmé tro lontan...

Rédaksion Zournal Démaliz – Mars lan 2020 - 
http://zournal-demaliz.blogspot.com/
https://www.facebook.com/Zournal-D%C3%A9maliz-492225557533691/ 

Po konèt :

Kopiaz roprodiksion intèrdi. 
Si zot i ropran lartik po fé konèt oubli pa di ousa i sort i kont si zot.