mardi 19 décembre 2017

Kozé Gouvernman Kontkolonial po Fèt Kaf

FET KAF IN MAZINASION PO NOUT BANN ZANSET VIKTIM LESKLAVAZ LA GINGN LO KOU EK BANN KOLON
Sa i fé parti nout listwar ... oubli zamé Sarda la roul anou, Figaro la vann anou, kolon touzour la minm. 


Paz Facebook Gouvernman Kontkolonial : https://www.facebook.com/gouv.run/

Paz Twitter Gouvernman Kontkolonial :
https://twitter.com/gouv_run


mercredi 6 décembre 2017

Gouvernman Kontkolonial

Zournal Démaliz ifé konèt azot Paz Twitter  Gouvernman Kontkolonial 

Pèz dosi lo Lien po louké : https://twitter.com/gouv_run



Rédaksion Zournal Démaliz 

jeudi 30 novembre 2017

Gouvernman Kontkolonial i sa domann in rokénésans Linyon Afrikinn

Ala in nouvèl po zot louké i sort dosi lo paz  https://www.facebook.com/gouv.run/ po zot konèt pèz dosi lo lien.

Rédaksion Zournal Démaliz

Gouvernman Kontkolonial i sa fé tout komifo po awar in rokonésans Linion Afrikinn #AUC po Léta rénioné nou la mèt dobout lo 5 novanm 2017. Nou baz anou su in Plan Stratézik banna lavé mèt an plass an Mé 2004 ousa té déklar #LaRénion sé in péi okipé par la Frans, sé in koloni. 

mardi 31 octobre 2017

Gran Lasanblé kontkolonial po mèt dobout in Léta Rényoné

Lo komité éspésial ke la fénésans lo gran lasanblé kontkolonial lafé in kozé lindi 30 oktob 2017 sikoté Lo sid Larénion po fé konèt lo Gran Lasanblé Kontkolonial po mèt anplas lo Gran Konsèy Kontkolonial é lo Gouvèrnnman Kontkolonial wa tyinbo dimans 5 novanm 2017 sikoté Tanrouz – Lo Plat – Piton Sinlé 9 vèr matin ziska 4 trèr laprémidi. 



Bernard GRONDIN i di zidé mèt anplas in Gran Lasanblé kontkolonial léné lo 26 zanvié 2017 kan li té konvoké dovan tribinal kolonial Sinn-ni akoz li té vé pa pas konm ''Juré d'Assises'' tribinal Sinn-ni li lavé di bann kolonialis antank dirèktèr Zournal Fanal é Port Parol mouvman indépandantis LPLP (Lorganizasion Po Libèr nout Péi) lapa posib in militan kont kolonialis ke i dénons zot sistinm kolonial i vien dann Tribinal kolonial po sèrv zot zistis é alé kondane rénioné. Dann ziz man la li la giny in lamand ke li la rofiz péyé. apré kontak èk lantouraz bann zindépandantis, bann kontkolonial, bann progrésis la désid mèt anplas in komité èspésial lo 25 mars 2017 ousa li sra dézinié lo portparol la komans travay dosi lo shart kontkolonial po di kosa lé bon po lavnir nout péi é koman i wa ali é la désid touswit fénésans lo gran lasanblé kontkolonial, gran konsèy kontkolonial, gouvèrnnman kontkolonial po dégrinn lo sistinm kolonial dan nout péi, po défann bann rénioné lé krazé dan zot péi, po lité kont linzitis kolonial é prépar inn konstitision, bann lwa é program po léta rénioné po domin bann rénioné i pran anmin zot péi é désid parnouminm é ponouminm po fini èk lo sistinm kolonial dan nout péi. Apré dan son kozé Bernard GRONDIN i di li noré pi fé tousala èk lo LPLP mé po tout i artrouv azot mèt anplas in gran konsèy kontkolonial té rasanb domoun ke i artrouv pa zot dann in mouvman politik li di lèr larivé po bann rénioné lé fatigé dann sistinm kolonial départmantal pran zot rèsponsabilité na pi lèr po kalkilé vi lo sitiasion lo péi lé dann in trin i sava dirèktoman dan in mir dir i sa kraz tout. Avan i tié tout li la pran anmin po mèt in not trin anplas po pa li mor avèk lo bann kolonial départmantalis, pars li di bana i koné i giny pi fé aryin èk sistinm départman mé lé zot prop lintéré pèrsonèl i kont avan, fé anprofit zot famiy, lantouraz, fé la rolèv po zot prop kan i kontinié aplik lo minm politik é kontinié rasmas mantèr nout popilasion.

Po fini son kozé Bernard GRONDIN i di sitiasion nout péi lé dodan dan tout domène lé an fayit lé grav ke dèrnié kou zélèksion 60 % domoun lapa voté alor kèl lézitime prézidan kolonial lafrans néna ankor dan nout péi okipé. Li kont si zot po ni mèt ansanm po ropran anmin nout péi po dégrinn lo sistinm kolonial.

Po konèt :
Lo komité èspésial ousa la mèt dobout lo gran lasanblé kontkolonial i atann zot tout dimans 5 novanm 2017 9 vèr apartir lao lo plat Sinlé kan zot i ariv la kroizé lo Plat Sinlé - Tèvlav suiv lo bann pano ziska kan zot i trouv bann lorganizatèr dosi bor somin. 
Aminn touzour in ti ban ou in ti sèz piknik si zot nana, sat i fo osi po mèt atèr po asiz é manzé. Oubli pa zot manzé, aminn dolo po bwar. Aminn touzour in ti palto dan léo défwa i fé fré. Si zot na kayanm ek Roulèr aminn ali po kraz inndé Maloya. 

Ala lo plan litinérèr po zot konèt ousa ilé : 



Po konèt dot zinfo alé dosi lo Paz évènnman Gran Lasanblé Kontkolonial po louké : https://www.facebook.com/events/168224257070130/

Zournal Démaliz é Félix i mèt ansanm osi po lo Gran Lasanblé Kontkolonial


Félix po Zournal Démaliz

lundi 30 octobre 2017

Gran Lasanblé Kontkolonial

Kozé èk la près zordi minm dan lo sid Larénion po prézant lo Gran Lasanblé Kontkolonial dimans 5 novanm 2017 sikoté lo Plat Sinlé https://www.facebook.com/lplprun/



lundi 25 septembre 2017

Kozman Fabris

Zournal Démaliz i fé konèt azot

Ala dé Kozman Fabris in Militan Kréol Rénioné kontkolonial i larg in kozé kosa ilé lo Gran Lasanblé Kontkolonial la anvoy po Zournal Démaliz.

Sé koué lo Gran Lasanblé Kontkolonial, é pokosa  i ansérv.
Lo Gran Lasanblé kontkolonial lé in rasanbléman domoun lé dann zasosiasion, koléktif, mouvman, lorganisasion, domoun gadianmb ke lé an akor ék la shart kontkolonial.
Lé bann domoun la, ke sera dan lo gran lasanblé, zot sra la pou aport zot pwindvi dosi kwék sé in rénioné é Larénion.
De par zot natir, se bann domoun-la i détyin inn parti la définision de Larénion é du rénioné.
Plis lo Gran Lasanblé Kontkolonial nora de pwindvi diféran é konplémantér mwin li nora d'angle mor dosi la définision de Larénion é du rénioné.
Sé se bann pwindvi diféran é konplémantér ke lo grand lasanblé la bézoin.
Donc si zot lé kapab adére a la shart kontkolonial é ke zot i vwa ke zot pwindvi i pé kontribié aport in vision san angl mor, alor ézit pa réklam zot plas dan lo Gran Lasanblé Kontkolonial.

Sé koué lo Gran Konséy Kontkolonial é a koué i sérv ?
Dan lo Gran konséy kontkolonial néna bann "Gran Konséyé".
Lo bann Gran konséyé wa sort du Gran Lasanblé Kontkolonial. Zot sera dézynié par zot lasosiasion, lorganisasion, mouvman, koléktif pou konpoz lo Gran Konséy Kontkolonial.
In moun tousél ke lé pa dan in group défini i pouré rant dan lo Gran Konséy Kontkolonial, selon bann kritér ke le Gran Konséy i devra définir.
Lo bann Gran Konséyé nora le devwar de fé in konstitision pou définir lo bann kontour La rénion é lo Rénioné.
Lo Gran Konséy nora la sharz de véy si lo travay lo gouvèrnnman lé konform la konstitision Larénion.
Lo bann Gran Konséyé nora lo dovwar de difiz lo bann bon réponse.
Lo bann Gran Konséyé sra lo garan de la définision d'in Rénioné é de Larénion.
Sé lo bann Gran Konséyé va définir kosa lé bon, kosa lé pa bon pou lo Rénioné é La rénion.
Donc si zot la adére a la shart kontkolonial é ke zot i vwa ke zot lé kapab travay dan in group pou konpoz lo Gran Konséy , alor ézit pa a dépoz zot kandidatir ék Eli Sinle dosi lo paz évènnman pou rant dan lo Gran Konséy Kontkolonial.

Fabris

Lien paz évènnman Gran Lasanblé Kontkolonial po louké  é mèt ansanm :

Zournal Démaliz i fé konèt azot : konba in Militan Kréol Rényoné kontkolonial Lalit kontkolonial po lindépandans nout péi Larényon


Zournal Démaliz i fé konèt azot : konba in Militan Kréol Rényoné kontkolonial Lalit kont kolonyal fé pété


jeudi 14 septembre 2017

Zournal Fanal N° 16 édisyon éspésyal léla

Zournal Démaliz i fé konèt azot Zournal FANAL N° 16 Sètanm 2017 in lédision spésial po lo Gran Lasanblé Kontkolonial wa tyinbo Dimans 5 Novanm 2017 sikoté Tan Rouz – Lo Plat – Piton Sinlé. Anndanla nora tout bann Zinfo dosi lo Gran Lasanblé Kontkolonial. I atann zot tout po mèt ansanm .Gayar lèktir azot.

Louk ali andsou dosi zot Paz é fé konèt otour zot bann konésans. Mèrsibyin.


Paz Fasbouk Fanal  : https://fr-fr.facebook.com/fanalrun/

Rédaksion Zournal Démaliz 

samedi 9 septembre 2017

FANAL N°16 SETANM 2017 i ariv tanto

ZOURNAL INDEPANDANTIS RENIONE
FANAL N°16 SEPTEMBRE 2017
EDITION SPECIALE
(disponible en téléchargement en début de semaine)
Lékip Fanal



jeudi 31 août 2017

Paz évènnman Gran Lasanblé Kontkolonial

Ala lo paz évènnman Gran Lasanblé Kontkolonial po zot mèt ansanm. Zournal Démaliz i mèt ansanmavèk osi.

Zot lé fatigé èk lo systèm kolonyal dan nout péi alor vyin mèt ansanm po lo Gran Lasanblé Kontkolonial wa tyinbo Dimans 5 novanm 2017 – 9 vèr matin / 4 trèr laprémidi sikoté kartié Tan Rouz - Plat Sinlé sra in zourné istorik po nout péi po dégrinn systèm kolonyal fransé dan nout péi, po mèt dobout in léta rénioné. Alon mazine nout lavnir ponouminm parnouminm.

Tanto si zot i vé prann kontak èk lo bann lorganizatèr Zournal Démaliz wa done azot in mail po konèt plis dosi zourné-là.

Lien Gran Lasanblé Kontkolonial :

Rédaksyon Zournal Démaliz  - In Not Manirwar Lavnir Larényon

Shart Kontkolonial


Té dobout sanm lo mouvman indépandantis rénioné, zot lé invité po bann zasise la dékolonizasyon nout péi.


In Gran Lasanblé Kontkolonial, po mazinn nout lavnir parnouminm.
Toutsat lé dakor ek nout Shart Kontkolonial alon mèt ansanm, alon dégrinn lo sistinm kolonial.

Shart Kontkolonial : "Anou lo pèp, anou rénioné, nou rovandik nout léritaz, sat y prann an kont listwar lèsklavaz, ek la kolonizasion dopi 1663 ziska zordi. Anou manm bann zasosiasion, bann kolèktif, bann mouvman, bann lorganizasion y vanz po pa oubli nout listwar, nou konstat parnouminm, podvré, dan kèl malizé nout péi ilé dan tout dominn nout vi toulézour. Toutsala nou wa partou, toultan.

Tout lo bann problinm la finn ariv anou, akoz zot la anprofit su nou, la abiz su nou é tout lo bann mové zafèr la pa arèt tonm su nou é kraz anou, toutsala na in sèl rasinn, sé lo dominasion léta kolonial fransé la mèt an plas. Toutsala y tiyn pa kont nout kisanoulé.
Nout listwar lé méprizé la lèss ali dan fénwar la minm fé krwar li té ekzis pa, nout prop lèkzistans na pwin valèr po zot.

Apré in tralé zélèksion ek zot bann promès mantèr, lèr larivé po nou lèv dobout. Lo sèl zafèr y kont po nou, sé mazinn - parnouminm é ponouminm - nout lavnir ek sat nout bann zanfan, minm si bann kolonialis y arèt pa mèt la pèr si nou é manti ek nou.

Anou, domoun, zasosiasion, kolèktif, mouvman, lorganizasion, lo pèp rénioné, alon mèt ansanm - nout tout égal antnou - in vré lantouraz po armèt nout péi an lèr é protèz lavnir nout bann zanfan.
Alon kas la sinn é rant dann ron po mèt an plas in Gran Lasanblé Kontkolonial, in vré soubasman po domin, popilèr é po linité nout pèp.

Lo shart la y esplik kom y fo lo bann règloman lo Gran Lasanblé Kontkolonial, ke va travay po Larénion dan tout son diversité kiltirèl é dan tout son dimansion sosial é ékonomik, po fénésans in léta rénioné ek in Gran Konsey é in Gouvernman Kontkolonial.

Lo pwindvizé lo Gran Konsey Kontkolonial sé mèt an plas in konstitision po in léta rénioné, prépar la lwa po domin , sra li va vey ke léta rénioné y respèkt la lwa kom i fo.

Lo pwindvizé lo Gouvernman Kontkolonial sé prépar in program gouvernman po domin, aport son solidarité kan y fo, défann lo rénioné kont lo sistinm kolonial fransé, sé li nora la responsabilité ladministrasion kontkolonial, sé li nora la responsabilité protèz nout pèp, nout péi é nout bann zinstitision nou la mèt an plas kan y fo é kom y fo. Sé li va roprézant nout péi an déor.
Lo Gran Lasanblé Kontkolonial va ekzis podvré lo zour na mèt ali dobout nout tout ansanm. Lo bann moun sra la va roprézant swa zot minm, sinonsa zot bann zasosiasion, kolèktif, mouvman ek lorganizasion, y fo zot lé kontkolonial.

Po mèt ansanm kont lo kolonialis, lo promié zafèr po fé, sé vanz po nout kiltir, po in lavnir lib, zis é égal dan in sosièté ousa lékonomi lé po nou minm.

Kolonialis lé partou Larénion, dann la kaz, dann lékol, dann travay, dann ladministrasion.

Sé touzour bann maléré lé dan malizé, sak nou la bozwin pou viv lé tro shèr (dolo, kouran, manzé, linz, la kaz). An misouk, i obliz anou pran in manièr viv ek in lédikasion y sort déor, po nout famy, y tir responsabilité papa manman pou mèt plis si marmay. Y obliz anou viv pou ashté kom dan péi déor. Zinformasion dann télé lé mantèr épi i sava dan in sèl koté, piblisité i rèspek pa nout manièr war la vi, nout kisanoulé é li mèt touzour sat péi déor dan nout koko tèt. 

Bann program dan lédikasyion lékol i rod ryink ranpli la tèt marmay ek bann modèl kiltirèl é ékonomik, sat i konsern pa nou, sat lé pa bon po nou. Y rabès nout lang ek listwar nout péi. Bandna i mèt an lèr bann valèr lé kont natir, i mèt an lèr shakinn pou son shakinn. Zot i protèz pa sat lé atèr, azot minm y désid sat nou la bozwin sat lé bon po nou, lo méyèr lé touzour po zot. Nout mizik lé rabésé (dann radio, télé, zournal, internèt, dan tout kalité manifèstasion kiltirèl), nout fason dansé, nout fason kozé, nout fason ékrir, nout fason fé désin, nout bann tizanèr, nout patrimwan lé abandoné, nout bann pratik po lo respé nout bann zansèt (servis, lomaz zansèt, tout bann fèt rélizion) ek tout nout bann tradision (la pèsh, la shas, rod bwa sèk). Partou na makrotaz po in plas sinonsa in subvansion po fé lo fransé, tout lé tèt anba, na pi riyn y marsh, na pi riyn y rosanm anou.

An misouk bandna i rod pou défann anou planté po manzé, mont lantrepriz ek gran lizinn, i défann anou form nout bann zinn, y anpès azot trouv in vré travay dan zot péi, y anvoy azot lot koté la mèr po armèt domoun andéor travay nout plas. Makrotaz, préférans po mantalité gro kolon, la vi shèr y profit riynk po sat lé anlèr. 

Di sat nou ve bann zéli i fé pa in kont avèk, lo bann domoun i travay dann ladministrasion lé konplis é zot i di pa riyn osi.

Toutsat lé dakor ansanm tousala, alon sign lo shart kontkolonial é fé tout po fé respèkt ali.

dimanche 27 août 2017

GRAN LASANBLE KONTKOLONIAL

Zournal Démaliz i fé konèt azot é i tyinbo ansanm. Fé konèt otour zot...

Rédaksyon Zournal Démaliz  

Té dobout sanm lo mouvman indépandantis rénioné, zot lé invité po bann zasise la dékolonizasion nout péi.
In Gran Lasanblé Kontkolonial, po mazinn nout lavnir parnouminm.



vendredi 28 juillet 2017

Bann nouvo migran i débark

Artik Po Lir ou Rolir …

Po fé arviv azot bann nouvèlté fine difizé po sat i koné ou lapa ankor lir. Alor gayar koudzyé lèktir azot é kontinyé tyinbo ansanm Zournal Démaliz lo tan dot nouvèl i ariv. Difizé lo 17 out 2015


Konm toulézan sak rantré lékol, Larénion i koné in mouvman popilasion kiswa bann débarkman nouvo migran fonksionèr ladmistrasion kolonyal fransé, i sort an frans é dan lé zot bann koloni, é bann zansien koloni lafrans, é dot zétranzé i ariv an poundiak po antrotien ladministrasion kolonial fransé dan nout péi po amont bann marmay rénioné zot lédikasion éropéanizé é fransizé é konm toulézan bonpé zéne rénioné é azé lé oblizé ou forsé ou i vé osi san èt konséyé kit zot péi po alé imigré sikoté péi lafrans, péi Kébèk é dan dot péi nou lé pa kont si lo rénioné i vé form ali ou viv andéor si i sava san èt forsé akoz pa mé fo néna in rotour osi kan lo rénioné lé formé i vé artournné na lo drwa awar osi in travay dan son péi mé gèt zordi lapa lo ka lé sat i sort andéor i akapar tout. Ala lo sitiasion nout péi lé dodan, i kontinié dévid nout popilasion lé né isi, po kolonizé èk dot nouvo kolonizatèr, ala lo méfé lo kolonialis fransé fé zot propagand èk konplisité bann politikèr é rénioné i soutien lo sistinm départmantalis po bous lo zié bann zène rénioné i di azot na pi lavnir dan zot péi po aprann é travay fo alé andéor é an rotour i fé débark in takon domoun andéor po prann la plas lo rénioné é nout tèr. Po konèt toulézan néna in takon migran i sort déor i ariv dan nout péi Larénion apré zot i instal azot po toultan, lé rantré lékol mwad Out néna plis, an rotour bann èspatriyé rénioné i rotourn an ti kantité é néna bonpé i giny minm pi artourné po war zot famiy. Zot wa di lé normal bann domoun-là na lo drwa rantré pars Larénion lé in départman fransé lé normal kan ou réklam èt fransé mé po bann zindépandantis rénioné i sobat kont-kolonyalis fransé lé zot drwa é dowar dénons sa po bord sistinm-là, é sré tan dobout po arèt lès dévid nout péi é modifié nout popilasion, ziskakan na rès dan lo désépwar é lès lo sistinm kolonial tié anou. Fo pa nou lapèr pran nout destin anmin é atann tout èk lafrans rès kome noulé inn sékat nout sra étranzé dan nout prop péi é sa minm kolonialis fransé la po fé dévid nout popilasion po mié komandé alor démaliz anou avan lé tro tar. Po konèt konm toultan nou di si Zournal Démaliz po bann rénioné i défann lo sistinm départmantalis i vé pa larg lafrans pars zot lapèr nora pi lavi fasil é fasilité larzan sé posa po sat i sobat po in péi tanou minm nou lé fane fané sakinn dan son kwin kontinié maroné, rézisté po fé prann konsians domoun si lo kolonizasion nout péi..

Rédaksyon Zournal Démaliz 


Po konèt :

Si zot i ropran lartik po fé konèt oubli pa di ousa i sort i kont si zot.


Rédaksyon Zournal Démaliz – http://zournal-demaliz.blogspot.com/

mercredi 26 juillet 2017

Démaliz i koz èk zot

Mèrsibyin azot osi sat i tyinbo èk lo Paz Fasbouk Zournal Démaliz https://www.facebook.com/Zournal-D%C3%A9maliz-492225557533691/ bèl konpliman po zot konfians inkièt pa si na pwin tro nouvèl Démaliz i bouz ankor po lité po nout péi. 

Rédaksion Zournal Démaliz  

Rapèl po zot konèt

Kisa ilé Démaliz ?

Zournal po dénonsé tout kalité linzistis néna dan nout péi é andéor, po fé prann konsians pèp rénioné po in not manirwar lavnir Larénion kiswa politik kiltirèl é dot zafèr nout vi toulézour é lité kont lo sistèm kolonial i diriz anou...

Zournal fénésansé par in militan kontkolonial po lindépandans Larénion

Rédaksion Zournal Démaliz  

samedi 22 juillet 2017

Mon Koudzyé Si Laktialité

Zournal Démaliz ifé konèt azot Paz Fasbouk  ‘’Mon Koudzyé Si Laktialité’’ 


Rédaksion Zournal Démaliz 

mardi 4 juillet 2017

Oté ti plantèr arèt anval la bav krapo bann kolonial

Kozman po bann ti plantèr kann lapo sobat na in bout tan po in ti moné po lopri tone kann èk bann zizinié kolonial i diriz nout péi mandoné fo arèt domand siouplé dann sistèm makot nout péi lé dodan zordi. Oté ti plantèr bord bann larzan kolonial, sindika kolonial sèl solision po pran anmin bann zizine kann sra lindépandans wa sov zot métié nora pi bézoin bès kilot dovan bann gro zozo kapitalis kolonialis i sort andéor bana i pran azot po kouyon. Alor tank zot wa rès anmaré dan lo sistèm kolonial zot sra toultan dann bèzman, dann malizé larzan, andété èk bann krédi bana la angant azot dodan. Pouwar larzan i dwa pa désid po nou, i dwa pa komand anou. Planté po nou manzé arèt angrés bann zizinié.

Ala in gayar tèks Défin Franswa Sintomèr la ékri po bann Plantèr zot i pé artrouv sa an mizik. Po ankouraz zot konba...

Plantèr

Plantèr po planté
Li lé kontan planté
Lèrk po zot péyé 
In ralé pousé

Mésyé dann biro klimatizé
La fine kalkilé
Koman li sar ralé
Plantèr dann malizé

La koup larivé
Bann kann nana borèr
Nou té toultan planter
Nou vé pi rant somèr

Mésyé dann biro klimatizé
La fine kalkilé
Koman li sar ralé
Plantèr dann malizé

Mésyé sindika oté
Li lé parti ‘’Paris’’
Koz èk gouvèrnnman fransé
Mizèr nou po pasé

Mésyé dann biro klimatizé
La fine kalkilé
Koman li sar ralé
Plantèr dann malizé

Toultan nou plant kann
Toultan nou lé planté
Kansa nou va konprann 
Planté po nou manzé

Rédaksion Zournal Démaliz 



dimanche 18 juin 2017

Zélèksion kolonial i aral pi

In kozé dosi zélèksion kolonial té fé dann nout péi okipé lo 11 é 18 zyin 2017 po dépité fransé. Gèt zordi forstan bann politikèr na lontan lapo taz la gèl bann domoun in gran mazorité lapa voté la désid fé in grèv po kri zot kolèr po zélèksion-là alor i fé bann dépité la rantré té éli par inn minorité zélèktèr kèl lézitim zot néna kan in takon domoun i vot pi ala koman systèm politik kolonialis fransé lé an fayit dan nout péi. 

Oté ! Kréol Rénioné lèr larivé po sat i krwa pi bann zélèksion kolonial alon daloné po mazine in not domin po nout péi andèor sistèm kolonialis départmantalis ousa na tro lontan lapo bord anou dan nout péi.

Rédaksion Zournal Démaliz  

mardi 6 juin 2017

Zournal Démaliz i fé konèt azot

Ala in kominiké Lorganizasion Po Libèr Nout Péi (LPLP) dosi kolèr bann plantèr kann i sobat kont bann zizinié po i argomant lopri tone kann. Louk lo lien zot Paz po konèt plis https://www.facebook.com/lplprun/photos/a.666738320038521.1073741826.122323141146711/1377609278951418/?type=3&theater



Paz Fasbouk LPLP : https://www.facebook.com/lplprun/

Rédasion Zournal Démaliz 

jeudi 1 juin 2017

In rapèl po zot konèt

Bonpé i domann Zournal Démaliz koman prann kontak èk bann rèsponsab LPLP (Lorganizasion Po Libèr Nout Péi) ala lo gatir Paz Fasbouk LPLP : https://www.facebook.com/lplprun/ po kontak azot.
Rédaksion Zournal Démaliz 

dimanche 21 mai 2017

Zournal Fanal N° 15 édisyon éspésyal

Zournal Démaliz i fé konèt azot Zournal FANAL N° 15  2017 in lédision éspésial ousa i rann omaz Jean Claude BARRET.

Louk ali andsou dosi zot paz...




Zournal Démaliz 

jeudi 27 avril 2017

Pèp rénioné dégob anou èk bann zélèksion kolonial

In kozé manirwar rèsponsab Zournal Démaliz dosi zélèksion kolonial prézidan fransé té fé dimans 23 avri 2017 dann nout péi okipé par bann kolonialis fransé.
Zélèksion kolonial té fé dann nout péi okipé po prézidan lafrans lé san valèr po sat i artrouv azot dan lèspri po lindépandans Larénion. Astèr sat i artrouv azot dan lèspri lafrans èk lo makotaz bann parti politik dan nout péi okipé lé azot larg zot gro pléré ant zot.
Sakinn astèr idwa swazi zot kan séposa fo bann vré zindépandantis é sat i artrouv pi azot dann sistèm kolonial i dobout po kapoune tout kalité kolonialis néna dan nout péi lapo mal prop nout péi èk zot bann parti é zidé politik inporté frans. Lèr lévé larivé po fé rèspèk anou.
Alor tousat i krwa dan in not manirwar Larénion Dimans 7 Mé 2017 Zélèksion Kolonial Dann Nout Péi Bord Ali
Rédaksion Zournal Démaliz 

mardi 25 avril 2017

Nouvèlté Larénion okipé par lafrans : Marine Le Pen i fé 23, 46 % dan nout péi : kisa lotèr !

Zourpozour, lané partsi lané, vot dosi vot, nout Péi Larénion i kontini anfonsé dan lindinité. Ala koman, Marine Le Pen lidèr Front National, in parti kolonialis fransé ousa lapo fane zot manzé gaté dan nout péi, lafé 23,46% po zélèksion kolonial po prézidan fransé dan nout péi okipé. lé dann bann komine Tanpon, Pléne Dé Palmis, Sint Mari, Sin Bénwa, Sin Lwi, Lantré Dé, Sin Filip, Salazi é Latil la vot po Marine Le Pen.

Kisa ilé angro bann domoun la vot po lo Front National isi dan nout péi lé bann domoun atèr abandoné par lo sistèm dopi lontan é fatigé èk bann parti tradisyonèl (droite / gauche ) ousa sak kou zélèksion i taz zot gèl é bann zouvriyé, ti plantèr, ti zantropriz fatigé pèy tout zafèr èk in ti salèr alor po kri zot kolèr zot la mèt zot lam dan in Parti ke zot i krwar wa tir azot dan zot soufrans konbyin dan zot famiy ladi po zéléksion-là i sa vot Le Pen pars zot i krwar i sar tir azot dan zot mizèr zot i rèv . Alor sat zot i koné pa lé in parti i fane lo rasis lo fasis lé danzéré po ladémokrasi inporté dan nout péi ousa zot pwindvizé kasyèt zot figir lo dyab an bondyé po anblouz domoun atèr. Non mon pèp rényoné Larénion lapa in téritwar po bann rasi fasis fo pa zot i fé malol azot èk bann zidé lo Front National péi Larénion i dwa rès ouvèr si lo mond é dan linité, létan fo nout tout i bord bann mouvman i sort andéor po fane zot vomi kolonial dan nout péi séposa Zournal Démaliz i di po fini èk tousala i fo Lindépandans po Larénion vitman pars lé tro fasil atann aryink larzan lafrans mandoné fo lo pèp rénioné i pran in kou zot rèsponsabilté po bord tou bann kolonizatèr lapo diviz anou po zot giny pouwar komandé.

Ziété dosi domoun bann komine la vot po lo front national la plipar lé bann komine-là néna bonpé délinkan, somaz, malizé sosyal, linsikirité é bonpé kominoté maoré akoz zot lé bordé dan zot kwinvi é abandoné par zot mèr é na pi riyin po zot dan zot lavi toulézour dan zot komine...

Rédaksion Zournal Démaliz 

mercredi 19 avril 2017

Rasanbléman kontkolonialis

Ala in zinfo Zournal Démaliz i fé konèt azot.

TANSION PANGAR LARENION LEVE !!!
Bonpé lorganizasion épisa LPLP (Lorganizasyon Po Libèr Nout Péi) i atann azot dovan préfèktir SinDni vandredi 21 avri 2017 9 vèr apartir.

Po dénons sistèm kolonial é po tyinbo ansanm Péi Giyane lé an lit.


Zournal Démaliz lé solidèr èk bana é bann Giyané.
Rédaksion Zournal Démaliz

lundi 3 avril 2017

Zournal Fanal N° 14

Zournal Démaliz i fé konèt azot Zournal FANAL N° 14 Avri 2017. Louk ali andsou dosi zot paz...


Paz Fasbouk Fanal : https://fr-fr.facebook.com/fanalrun/

Zournal Démaliz 

jeudi 12 janvier 2017

Po zot minm

Bonpé i domann koman prann kontak èk bann rèsponsab LPLP (Lorganizasion Po Libèr Nout Péi) ala lo gatir Paz Fasbouk LPLP : https://www.facebook.com/lplprun/ po kontak azot.
Rédaksion Zournal Démaliz