jeudi 29 décembre 2016

Drapo Nasional Larénion

In rapèl po zot konèt

Néna in bout tan, bann zindépandantis, nasionalis rénioné, té antrinn maziné in vré drapo po Larénion. Zordi dorénavan, sé lo drapo Larénion lé anlèr, nout drapo nasional.
Ala lo gayar nout drapo pa bézwin nou lapèr lèv ali anlèr é fé rèspèk ali.


Kosa i vé di lo bann koulèr drapo nasional Larénion

. Lo rouz lo tan lèsklavaz é langazis, kosté èk in zétwal zone sink koté.
. Lo zone kouraz bann ti travayèr é bann lit yèr ék zordi.
. Lo vèr lo maronaz.

Po konèt : Té lo 14 zyin 2008 drapo Larénion la lèv dobout

Rédaksion Zournal Démaliz 

dimanche 18 décembre 2016

Omaz po bann zansèt

Mardi 20 désanm 2016 - Fèt Kaf
Larénion i rann omaz zot bann zansèt zèsklav
1848 – 2016 néna 168 tan lafé labolision lèsklavaz dann péi Larénion
20 désanm in souvnans po bann Nwar Maron

Gayar Fèt Kaf Pèp Rénioné

Rédaksion Zournal Démaliz 

Fo anou in gran vin désanm in vré dat i anons nout libérasion nasional

Toulézan sak fin lané po souvnans labolision lèsklavaz désidé par bann komandèr kolonialis lépok i fé lafèt in pé partou po rann omaz bann zansèt nwar maron koméla lé bann mèr i organiz tousala dan zot manièr maziné koman fèt sa lé touzour bann départmantalis i tyinbo larné vin désanm alor kansala bann kont- départmantalis i dobout po in gran fèt po nout libérasion nasional po in vré libèrté. Lé LIB kan la sène kolonial lé kasé brizé povréman..

Rédaksion Zournal Démaliz 

Kèl libèrté ?

Vin désanm in dat bann kolonialis la donn anou po souvnans nout bann zansèt té zèsklav sistèm ésklavazis kolonialis dann komansman pèpléman Larénion la souk azot sikoté Lafrik, Madégaskar po fé azot zèsklav si tibout latèr-là lafé Larénion zordi séposa vin désanm fo apèl ali Fèt Kaf souvnans po bann nwar maron sé zot la giny kout sabouk èk bann zèsklavazis gro blan (gro blan lé bann domoun rasis na pwin kèr po lé zot koulèr lé in ras té vé komand limanité) 168 tan apré Larénion la pa sort dann sékèl é na pi ropèr sé posa koméla nout sosiété i viv dan la violans, dan lapèr é lé bann matriz kaf zésklav zansèt lé plis bordé dann nout péi na pwin riyin léfé po rann azot omaz kontrèr sé bann zansien zèsklavazis lé mi an valèr kiswa èk bann stati, non somin é dot... Séposa dat vin désanm swazi par bann komandèr kolonial lé ankor in dat po kouyonialis anou zordi i di anou fo zwé maloya mé néna in travay mémwar nout bann zéne i lèv po fé konèt kosa lété sistèm ésklavazis na ankor sobatkozé po di si in krim kont limanité kaf rénioné té viktim par bann zèsklavazis si labolision kout sabouk la fini lèsklavaz modern lé ankor-là lé in lit pli dir po lité po abolir tout sat i anpès anou avansé po èt lib povréman
Rédaksion Zournal Démaliz 

20 Désanm - Fèt Kaf

Po lir, ou rolir...

Mardi 20 désanm 2016 wa rann souvnans omaz zansèt po bann nwar Afrikin é Malgas ke té déporté si ti bout latèr dann milié Loséan Indien zordi i apèl Larénion ousa la fini par donn ali son non pèp rénioné sa minm i fé zordi nout batarsité, in pèp banyan, tout koulèr. Koméla po souvnans labolision lèsklavaz lo 20 désanm lo sistèm Kolonialis Départmantalis lé anplas i vé done ali in koté folklorik i apèl sa (Festival Liberté Métisse, Fête de la liberté, Fête 20 décembre…) , po fé plis touristik la di fo pi i di Fèt Kaf non va fo pa ékout so bann départmantalis fo nou kontinié apèl ali Fèt Kaf lé lo Kaf la giny koud sabouk èk bann zèsklavazis Gro Blan lé vré zordi nout nasion lé mélanzé mé fo pa nou oubli bann zansèt nwar té zot la sibi lèsklavaz. Alor in gayar souvnans Fèt Kaf Pèp Rénioné. Oubli pa sa 1848 - 2016 néna 168 tan sa pèp nwar maronèr la kas la sène po di arèt èk lèsklavaz é lèsplwatasion bann Gro Blan mé lo vré libèrté nou la pankor ginyé lé anou zordi roprann lo flanbo po libèr nout péi dan lamin kolonialis fransé.

Rédaksion Zournal Démaliz

Néna 168 tan : lafé labolision lèsklavaz

Po lir, ou rolir...
Lané 2016 i mark lo 168 tièm lanivèrsèr labolision lèsklavaz dan bann dèrnié koloni lafrans. Isi Larénion sra lo 20 désanm bann Kaf Rénioné é Rénioné mélanzé wa rann omaz zot zansèt la sobat é lité po zot libèrté kont lo sistèm ésklavazis, pli gran krim kont limanité, in mové pasaz nout listwar ke tout bann rénioné i dwa pa oubliyé é prann konsians po avans dan lo koté pozitiv é linité lo pèp rénioné…
Lo 20 désanm lé gayar fé kabar, mé lé inportan fé in rokèyman po lo martir bann zansèt nwar maron la sibi dan lo pèpléman Larénion, zot la pa domann i déport azot si in ti bout latèr dann milié Loséan Indien ousa zordi la fé Larénion tout koulèr…
Plis zamé nou dwa kontinié alim flanbo bann maronèr la donn anou po kontinié lalit dan tout nout drwa po tras somin la libèrté…
Gayar ‘’Fèt Kaf’’ po 20 désanm Pèp Rénioné.

Rédaksion Zournal Démaliz 

dimanche 4 décembre 2016

Solidarité èk Bernard GRONDIN

Akoz li té vé pa pas konm ''Juré d'Assises'' tribinal Sindni li lavé di bann kolonialis-là antank dirèktèr Zournal Fanal é Port Parol mouvman indépandantis LPLP (Lorganizasion Po Libèr nout Péi) lapa posib in militan kont kolonialis ke i dénons zot systèm kolonial i vyin dann Tribinal kolonial po sèrv zot zistis é alé kondane rényoné. Konm li la rofizé é té pa la bana la kondane ali li sra konvoké dovan tribinal kolonial ''Sanfléri Sindni'' Zédi 26 zanvyé 2017 bann Makrominm (i vé di Kolonial) i vé fé in lèkzanp èk li é pi po tousat i dénons zot systèm lé azot i komand dan nout péi okipé. Alor po soutyin ali néna inn rézistans lé fé dobout po kosté sanm li po nir mèt ansanm po tousat na mwayin nir i artrouv azot Zédi 26 zanvyé 2017 dovan tribinal ''Sanfléri sindni'' po in lantouraz solidarité minm sat i giny pa nir zot tyinbo ansanm partou dosi lo wèb dosi térin lé inportan osi zot soutien èk Bernard GRONDIN po dénons zistis kolonial dann nout péi Larénion.

Po konèt plis : Lir Fanal N° 13 kozé Bernard GRONDIN po éklèr azot son konba kont kolonialis é pokosa li lé konvoké dovan tribinal kolonialis fransé.

Gatir po zot louké é po kontak ali po zot soutien

Zournal Démaliz lé solidèr èk Bernard GRONDIN po son konba kont zistis kolonialis dann nout péi Larénion.
Ala lo zimaz andsou po louké é fane ali partou po inform zot zalantour mèrsibyin po li.
Rédaksion Zournal Démaliz 

jeudi 1 décembre 2016

Zournal Fanal N° 13

Zournal Démaliz i fé konèt azot Zournal FANAL N° 13 Novanm 2016. Louk ali andsou...



Zournal Démaliz 

mercredi 30 novembre 2016

Malokisité minm

Bonpé langkozé dosi lo wèb i di fo siprim bann larzan lasistana bin kisa lamèt sa anplas lé zot kan minm sat zot i mèt anlèr sakfwa néna zélèksion. Done Larénion son lindépandans apré na kozé koman organiz nout péi dan in not manirwar po linstan lapa sak i giny larzan lasistana lé asisté mé tout rénioné ék lékonomi lé asisté èk fasilité lafrans i done po koloniz nout péi alor avan larg zot bann malokisité réflési bien avan bat zot mové lang.
Rédaksion Zournal Démaliz 

Kozman po lavnir

Lo zour Larénion wa giny pran anmin son destin la na giny kontrol larivé bann zétranzé dan nout péi pars alièrk zordi ninport kisa i rant dann kolonizasion nout lé dodan. Osi fodra bann rénioné la kit zot péi forsé ou té vé alé sré gayar zot i rovien po dévlop zot péi fo zot i mèt an navan zot koté patriot avan lintéré larzan.
Rédaksyon Zournal Démaliz 

mercredi 23 novembre 2016

Kisa ilé Démaliz ?

Zournal Démaliz 
‘’Wèb Zournal Indépandantis Rénioné‘’


Lé èk kontantman i roswa azot dosi Zournal Démaliz

Zournal Démaliz lé mi dobout dosi lo Wèb po fé prann konsians lo pèp kréol rénioné po in not manirwar lavnir Larénion kiswa politik, kiltirèl é dot zafèr nou lavi toulézour andéor sistèm kolonial i diriz anou.

Zournal kont kolonialis, 
kont départmantalis ;
Zournal angazé po lindépandans Larénion ;

Zournal Démaliz i milit kont tout kalité kolonialis néna isi Larénion kiswa kolonialis rénioné é sat isort andéor i fé tout po anpès rénioné pran anmin zot péi.

Zournal Démaliz i di tout kréol rénioné lé fatigé èk sistèm-là organiz  azot partou ousa zot ilé po sobat kont bann kolonialis-là.

Zournal Démaliz lapa in mouvman politik mé son vizion politik po Larénion i milit po lindépandans Larénion é i soutien tout organizasion indépandantis i sobat kont kolonialis (fo pa zot lé rasis, fasis, zénofob, i dénig domoun, zèstrémis tou bor, bann kozman an grinn na poin zot plas tèrla.).

Zournal Démaliz  i di tout domoun ninport zot koulèr lapo i vé milit po libèr nout péi na zot plas isi Larénion nout pèi lé in pèp banian nou sa pa rofé listwar fo aksèp konm noulé fo arèt zwé la divizion si nou vé povréman nir in pèp lib fo nou fé linité.

Zournal Démaliz in zournal po bann kréolèr é tout sat i yème nout lang kréol rénioné.

Pokosa lé ékri an Kréol Rénioné ?

Zournal Démaliz lé ékri aryink an kréol pars lé nout Lang Nasional.

Lé nout lang matèrnèl dopi tan ti nou koz ali dan vant nout moman la bézwin nou kontinié fé avans nout lang lé in Blog po tout sat i yinm lo kréol rénioné ou sinonsa i vé dékouvèr wi anou osi lé kab donn nouvèl an kréol, na in pé i di fo ékri an fransé an anglé i pèrmé tout domoun konpran kosa néna po di, tèrla i désid ékri an kréol mé la pa fèrmé si lé zot lang.

Bin po tout sat i vyin tèrla po sèy koprann lir kréol, po dékouvèr, po louké ou i fatig zot lèspri Zournal Démaliz lé kontan roswa azot.

Po sat i konpran pa :

Konm néna désertin lé kont la lang kréol i vyin dosi lo Paz Zournal Démaliz i konpran pa akoz i ékri an kréol on diré i fatig zot lèspri po lir kréol si fatig azot i obliz pa zot pas zot somin zot lé lib swazi, mé obliz pa é di i fo ékri an fransé pli fasil po zot lir é po avwar plis vizitèr, oubli pa sa lo kréol la bézwin èt rèspèkté osi dan tout son kalité lé in lang konm tout bann lang dosi latèr.

Po lo grafi Zournal Démaliz i ansèrv grafi lékritir 77 / 83

Zournal Démaliz lé kosté èk lo pèp, lé imanis, lé laïk, lé démokratik, lé kontkolonial, lé kont tout kalité 974, lé kont tousat na lèspri figaro.

Po konèt : tèrla lé kont bann kozman difamatoir, rasis, zénofob…

Po konèt

Zournal Démaliz tout bann nouvèl dosi Fasbouk osi

Kosa néna dosi Zournal Démaliz

Zinformasion tout kalité
Kozman po bann domoun i ansèrv Zournal Démaliz dosi intèrnèt

Nou ankouraz azot koz èk nou alor larg zot bann kozé dosi nout Blog
Nou invit azot dann zot bann kozé lo rèspé

Dosi Blog-là lé intèrdi

- Koz an grinn
- Atak domoun
- Bann mésaz malprop kont lorizine lo moun i sort ou rolizyé
- Réklam, é difizyon zinformasyon komèrsyal
- Bann manirwar na pwin sans
- Bann mésaz na pwin sans
- Bann komantèr ou abiz bonpé, i zir domoun, rasis, foto insolan é sat lé kondané par la lwa
- Bann kontak pèrsonèl

Zournal Démaliz wa lir zot bann mésaz lo pli souvan posib. Alor pa bézwin awar pèr di si bann kozman i rèspèk pa lo règloman-lwa lo blog zournal Démaliz.

Kan zot i larg zot bann kozé fé ali dan lo rèspé.
Zot lé rèsponsab zot bann kozé, bann foto, é vidéo zot i mèt si lo Blog Zournal Démaliz.
Zournal Démaliz na lo drwa siprim tout bann zinfo é zoutiy i rèspèk pa son manir travay.
Bann kozman largé dosi lo Blog lé pa lo manirwar Zournal Démaliz.
Lé lo moun la difizé lé rèsponsab sat li la ékri.

Sat i kont fé
Po done nouvèl, po fé prann konsyans, po dénonsé...

Kosa néna
Po done nouvèl kiswa si lo malizé nout péi dan son bèzman toulézour é osi sat lé gayar dan tout son kontour dan in not manyèrwar lo bann nouvèl é andéor osi. Tyinbo ansanm po rès kalé.

Bann kozé si Blog-là lé vré vwa déranz inndé pars lapa abityé antann bann kozmandir, kozman vérité dan nout péi Larényon. Mé fo nou arèt kasyèt é anval aryink lo sikré èk la pansé inik nou lé dodan zordi.

Zournal Démaliz lé in paz fé sanm in Militan Indépandantis Kréol Rényoné po fé konèt bann nouvèl partou dosi latèr dan son manirwar laktyalité.

Kosa i vé di Démaliz : armèt dobout, drwat konmkifo, démaliz nout vi po in domin pli gadyanm, sobat kont mové lévolisyon nout péi lé dodan zordi.

Blog an Lang kréol Rénioné


Blog Zournal Démaliz : http://zournal-demaliz.blogspot.com/


Bon koudzié dosi Zournal Démaliz...

* Tout roprodiksion, kopiaz lé intèrdi fo domandé avan.

Rédaksion Zournal Démaliz - ‘’Wèb Zournal Indépandantis Rénioné‘’

vendredi 11 novembre 2016

Rénioné départmantalizé gard dovan zot port avan gard sat lézot

In kozman dosi zélèksion prézidan zéta zinyin té tyinbo mardi 8 novanm 2016 apré konésans lo vot tout kalité bat lang kiswa dan nout péi é andéor té kont lo prézidan la giny zélèksion “Donald Trump” i koz, i kri koman bann zamérikin zéta zinyin la élir in prézidan konmsa lapa élir “Hillary Clinton” kosa anou rénioné nafout èk sa i rogard bann zamérikin si zot la swazi lo sanzman pars zot lé fatigé èk lo systèm koronpi dan zot péi bann domoun lapo larg zot gro pléré in pé partou (in vot démokrasi fo rèspèk lo vèrdik). Po bann rénioné départmantalizé daborinn akoz zot i kri pa zot kolèr osi kont tout bann politikèr na plis 40 tan lé anplas isi dan nout péi lé magouyèr, volèr, koronpi, sisèr san, i ansèrv bann domoun mizèr po angrés zot zabo noré po di ankor... ék sistèm politik zordi noulé dodan na lontan léla po tinn nout pèp. Alor domin in politikèr indépandantis i giny in manda dan nout péi wa di lapa bon zot i aksèp pa osi nora ankor po zot kriyé tanto zélèksion i ariv an frans prépar azot po in gran sanzman si bann fransé atèr é bordé i fé konm bann zamérikin atèr é bordé fatigé èk bann politikèr é lo systèm na lontan lé anplas i vwa pa kolèr domoun nora po zot kriyé é bat zot mové lang ankor...
Zournal Démaliz i pran pa pozision po kikséswa mandoné fo dénonsé pansé inik nou viv dodan zordi ousa i fo tout domoun lé oblizé mazine parèy nonva Zournal Démaliz léla po lité kont bann pansé inik lapo tinn nout péi.
Po konèt:
Rénioné départmantalizé (lé domoun amaré i vé pa kit lafrans)
Rédaksion Zournal Démaliz 

mardi 1 novembre 2016

Samdi 5 novanm 2016 néna 205 zan bann zèsklav la révolté sikoté Sinlé

Zournal Démaliz i fé war zot in modékri dosi révolt bann zèsklav Sinlé lafé 5 novanm 1811 parkoté Sinlé in modékri po zot konèt koman robélion té dobout po kapot sistèm zésklavazis té anplas dopi pèpléman Larénion ziska laboliman an 1848 lé in bout révolt zèsklav Sinlé 5 novanm 1811 apré néna in bonpé zafèr té kasièt po pa nou koné tout la vérité dosi révolt-là é konbien dot révolt té fé po kapot sistèm zésklavazis dan nout péi dann pèriod lèsklavaz té roprimé dan in silans lamor.

Na 205 zan bann zèsklav la révolté sikoté Sinlé kont zot bann mèt èsklavazis an tèt lo révolt navé Eli èk son bann dalon té désidé kapot sistèm èsklavazis po zot giny zot libèrté moun. Si 205 zan apré bana la sèy kas la sène po zot libèrté zordi nout péi lé touzour anmaré èk la sène kolonialis fransé. 

Gayar loukaz azot.

Kozé Félix po Zournal Démaliz

In rapèl po zot konèt po pa oubliyé : Samdi 5 novanm 2016 souvnans révolt bann zèsklav 5 novanm 1811 sikoté Sinlé… Lir laswit par andsou…

Révolt Sinlé


Révolt Sinlé
Ravine Du Trou - Piton Sinlé

Lé lo 5 novanm 1811 ke Eli, travayèr dan métyé lo fèr, èsklav Célestin Hibon, Jules, èsklav Henri Hibon é Prudent, èsklav Benoît Hibon i artrouv azot sikoté ravine Trou Sinlé avèk zot navé zanviron 60 zèsklav é zot la désid organiz in soulèvman kont bann zèsklavazis Gro Blan sikoté Sinlé é kapar zot bann zarm é zot bann byin (manzé, larzan, lakol… é dot ankor) bann zafèr ke zot la fé èk zot kouraz.

Avèk bann kouto, bout dobwa, Kalou, tanbour é lansiv, armé èk kouraz é fors, zot la désann «konm in ravine dann mové tan» dann kartié Sinlé po fini èk la ras bann komandèr é libèr azot systèm lèsklavazis.

Dopi Sinlé, zot té vé alé dan tout bann kartié Larénion é po anminn lé zot zèsklav po konbat èk zot. Zot la atak dabor lo propriyété Jean Macé, zot la tié ali é kas son kaz, épisa zot atak tou lé zot ozanlantour.

Lo rèvolt wa dir bonpé zour, 5 novanm 1811 zisko 11 novanm 1811.

Vandi par dot zèsklav ke té vé protèz zot bann mèt, lèsklav Figaro lé promié la fé konèt lo rèvolt, apré té lo tour Paulin ke téla kan la tyé son mèt Jean Macé, rèvolt té roprimé dan lo san par bann mèt é akonpanié bann zèsklav la dénonsé.
Bonpé zèsklav rebèl té tié ou blésé, dot té arété.

11 févriyé 1812, tribinal té réini po sa dann Katédral SinDni po kondane bann rebèl Sinlé. Vèrdik zot té kondané a mor é zot té tyé in pé partou dann bann kartié larénion. Dot té kondané an prizon po toultan ou déporté.

Dapré i di Elie té kondané an déportasion

Figaro sat la vand bann maronèr zèsklav té rokoni par lo sistèm kolonial avèk in ti moné ziskatan li désot la vi an 1860. Paulin la giny la libèrté é lo non Céma, an kapotaz lo non son mèt Maçé.

Ala an gro pé in pé listwar bann zistoryin la rakont révolt bann zèsklav sikoté Sinlé lo 5 novanm 1811 mé néna ankor bonpé mistèr é vérité po konèt si rèvolt-là. Mé lé in dat inportan po nou rèvolt bann zèsklav 5 novanm 1811 lé domaz bann zénérasion zordi lapa giny roprann flanbo po kontinié kas la sène la libèrté.

In lékri zarlor Larénion

Rédaksion Zournal Démaliz 


Po konèt :

Si zot i ropran lartik po fé konèt oubli pa di ousa i sort i kont si zot.

samedi 1 octobre 2016

Po in Gabié sosial

Zidé Zournal Démaliz


Konm Larénion an mazorité i giny bann larzan sosyal po viv i fo mèt anplas bann gabié sosial, kont bank sosial i done 5 € , 10 € , pa aryink 20 € i fo bann bourzoi i komand anou i arèt krwa tout rénioné lé bourzoi gard zot minm koméla bann gabié ''La Poste'' i done pi 10 € é nadfwa na minm pi 20 € sé posa fo sat i diriz anou i mèt anplas bann Gabié sosial é bank anplas po bann domoun maléré lé obliz ariv-là pars nout sosiét lé divizé an dé néna in ti % i viv byin é in gran mazorité i viv dan la povreté.

Rédaksion Zournal Démaliz 

In kontrol tèknik po bann vié lozman

Propozision Zournal Démaliz

Akoz pa ! Po fini èk bann lozman abimé obliz bann domoun é zorgnism louèr bann lozman parèy po bann Loto, transpor lour fé fèr azot in kontrol tèknik zot lozman sat lé pli inportan po kondision vi domoun toulé 5 kan po romèt dan lé norm tank lapa bon intèrdi azot lwé osi tout bann zansien lozman po lité kont gaspiyaz lénèrzi kouran é po ékonomiz larzan domoun obliz azot mèt in Sof dolo Solèr. Akoz toultan lé bann lokatèr i dwa pèy tout é viv dan bann lozman malprop.

Rédaksion Zournal Démaliz 

dimanche 28 août 2016

Propagand kolonialis fransé

Zoutiy ''Pôle Enploi'' ladministrasion kolonialis fransé i di somaz i désann dann koloni Larénion lé mantèr la radié an pounndiak bann domoun san travay akoz i rod pa travay é anvoy nout bann zène an frans é in pé an formasion san landomin krwa pa zot pèp rénioné lé mantèr minm.
Rédaksyon Zournal Démaliz 

mercredi 24 août 2016

Dobout bann kréol mizèr

Larénion lé in péi an mazorité pov é asisté sosialman séposa dann sistinm politik noulé dodan zordi lo bann i diriz nout péi dann sistinm départmantèr kolonialis ousa i anminn inn politik sosial po bann domoun atèr é zamé po zamé zot nora in bon vouloir tir bann rénioné atèr dan lamizèr pars sa lé zot gardmanzé po défann zot manda mandoné fodra domoun atèr i rouv lo zié po arèt mèt bann gro zozo anlèr pars kont pi dosi bann bourzoi po tir azot dan lamizèr lé azot pran azot anmin é dobout po kapot lo sistinm bourzoizi lé anplas tank zot lapa konpri sa an gro pléré zot wa kontinié kourb azot dovan bann gro zozo po bana kontinié angrés zot zabo...

Rédaksyon Zournal Démaliz 

jeudi 18 août 2016

Po zot konèt : Zournal Démaliz lé solidèr èk tout bann mouvman i sobat kont kolonyalis

Zournal Démaliz lé fédobout ankosté èk Militan kréol Rényoné angazé politikman po kapounn systèm kolonyalis isi Larényon é andéor lapa anmaré èk okin mouvman politik. Dann son bann kozé léla po di la vérité po fane zidé nouvo dan in not manirwar lavnir nout péi andéor systèm départmantalis nou lé dodan zordi po lité kont tout kalité linzistis sosyal é bordaz domoun atèr po konsyantizé bann rényoné na pi ropèr dan manirviv koméla po zot prann anmin zot destin dan nout péi libéré kont tout kalité kolonyalis déor konm atèrla. Zournal Démaliz lapa zis po li tousèl lé osi fé konèt tout bann mouvman kont kolonyalis, kont départmantalis néna dan nout péi alor kan zot wa war bann zartik difizé dot mouvman kont kolonyalis alé pa krwar Zournal Démaliz lé dodan bann mouvman-là. Po Zournal Démaliz minm si tout bann kont kolonyalis lèspri maziné lapa parèy i fo solidariz anou po fé avans zidé po lité kont sat i diriz nout péi zordi dann systèm kolonyalis départmantalis. Alor si manir travay Zournal Démaliz i ral azot kan zot néna bann nouvèl kont kolonyalis kiswa zot ilé in mouvman ou militan tousèl ou domoun lakour anvoy zot kozman sra difizé Zournal Démaliz in zoutiy po zot osi.

Parkont kozman angrinn, rasis, i dénig domoun lapa difizé avan difizé Zournal Démaliz i kontrol lo bann zartik.

Po kontak Zournal Démaliz : Bwatmèl : zinfo.demaliz2015@gmail.com


Rédaksyon Zournal Démaliz - '' In not manirwar Lavnir Larényon ''

lundi 8 août 2016

Nouvo kontrol ''Pôle Emploi'' lamèt anplas lapo rann somèr fou

Domoun inskri ''Pôle Emploi'' lapo ni fou èk nouvo kontrol ''Pôle Emploi'' gouvèrnnman sosialis anti sosyal lamèt anplas sikoté in plat form pôle emploi laba Sindni ousa i rasanb tout bann konséyé té anbosé posa zot pwinnvizé radyé an kantité bann domoun inskri èk zot zoutiy ''Pôle Emploi'' po fé sann somaz po ke ''Hollande'' i rès anplas lané prosinn po zélèksyon prézidan si li krwa èk politik po lité kont somaz li wa rès anplas rèv pi domoun lé fatigé èk gouvèrnnman ''Hollande'' an 2017 zot nora bonpé biltin po di azot alé zwé kanèt astèr é tout bann politikèr i soutyin politik makot nout péi prépar zot valiz i rès pi bonpé tan po zot taz la gèl domoun minm sat wa roprann laplas nora pa gran soz osi po atann. Ek zot politik anti sosyal po lité kont somaz i fé astèr bonpé somèr lé oblizé alé war doktèr, sikiat dapré i di bana i di azot i giny pi èk bann kontrol ''Pôle Emploi'' lamèt anplas minm désèrtin bann konsèy i koné pi kosa fo fé. Kisa lé bann somèr lé kontrolé lé domoun na lontan i koné pi kosa i vé di in travay èk systèm lasistana léta fransé lamèt anplas na lontan dan nout péi é la tyé lo pèp rényoné pars la plipar domoun lé kontrolé lé san diplom, lé san formasyon lé dékalé nout sosyété koman dan in péi andémiké èk maladi somaz i trouv travay déza sat néna diplom formasyon i trouv pa travay isi Larényon dan lo dézèspwar lé oblizé kit zot péi po fé in travay sikoté lafrans na riyin awar èk kalifikasyon zot néna parlpi sat i atann in kontra san landomin lé politizé i done pa ninportki alor normalman kontra-là i dwa done bann somèr na lontan i travay pi po i di insèr azot dan lo mond travay é lé mantèr na pwin riyin lé fé lo bann sat i diriz anou i koz plis ke i fé. Zournal Démaliz lé solidèr èk bann domoun lé fatigé par ''Pôle Emploi'' minm si i koné po zot rasanb azot zot lé difisil akoz zot lé tousèl sakinn dan zot kwin san mwayin sra malizé po sobat kont nouvo systèm té mi anplas Zournal Démaliz i dénons nouvo kontrol ''Pôle Emploi'' lamèt anplas po kontrol bann somèr alor po sat i diriz anou travay in pé zot koko tèt po tir domoun na lontan i koné pi kosa i vé di in travay lé in not politik travay fo mèt anplas zot té éli posa. Po sort dann malizé travay Larényon lé dodan tank sra anmaré èk lafrans sra malizé po lité kont somaz pars la plipar travay lé bann domoun andéor i akapar tout po zot sé posa i fo pèp rényoné i rouv zot zyé po prann an min zot destin tank zot wa tèt kourbé koud fwèt kolonyalis wa kontinyé sabouk azot.
Rédaksion Zournal Démaliz 

Po gratuité bann liv po bann Liséin

Propozision Zournal Démaliz

Po bann Liséin é dot lé konsèrné po bann liv i fé pèy azot sré tan i arèt zwé volèr si zot tèt rasanb azot po ke bann liv lé anprinté gratuitman apré kan lané lékol lafini si lé abimé i fé pèy in moné liv lékol i dwa èt gratuit larzan i mank pa isi Larénion gard zot minm po bétone nout péi partou é fane larzan an gaspiyaz néna. Zournal Démaliz i milit po gratuité bann liv po bann Liséin fo pa oubliyé bonpé bann Famiy Pov na pwin moiyin pèy bann liv sèr parapor sat néna plis moiyin.

Rédaksion Zournal Démaliz 

jeudi 7 juillet 2016

Kozman po lavnir larénion !

Mi done mon mazinasion koman mi wa lavnir Larénion i kritik pa pèrsone lé mon pwinnvi si ral azot lir si ral pa zot lir pa dann mon kozman i apèl pa fé in révolision lé in koudzié sat i pé atann anou inn sékat... Bon lèktir azot.

Kozé Félix po Zournal Démaliz in lékrikoz mwin la fé na in boutan sa mi di akoz pa partaz èk zot bon lèktir azot...

Po ti pé zindépandantis i rès é sat i lèv i krwa ankor bann zélèksion kolonial wa fé giny lindépandans Larénion rèv pa po linstan. Akoz ? Dann mon lékrikoz mi di sa pars bann rénioné lapèr kit lafrans lé tro anmaré minm sa té an salèr dan lo milié zintèlèktièl konm indépandantis la sié èk sa. Kan néna in lis indépandantis i prézant si po fé in ti % lavwa é san mwayin (na in pé i di fo alé ziskakan ? ) sra touzour moukaté pars lo pèp i yème lafrans zot sovèr po linstan. Bin zot wa di koman nirbou giny lindépandans Larénion zot i koné Zournal Démaliz léla po done son manirwar lavnir Larénion dan listwar tout bann pèp la sort sou lo joug bann kolonizatèr la plipar la giny zot lindépandans par lalit èk in rapor fors kont lokipan po Larénion sra oblizé pas parla mandoné si ariv pa par lo vot i pé ariv osi par in rapor fors kont lokipan apré koman sra fé listwar wa koz po nou i pé alé vit konm rès lontan inn koloni lafrans pars dan lo sistèm politik noulé dodan ousa lafrans i done tout sat rénioné i domand koman ouvé néna ankor zindépandantis i lèv an poundiak. Mé tansion pangar la sène lasistana i pé kas vitman parkoman ? Ariv lafrans i tonb an fayit pars lékonomi lé dann malizé, linion éropèinn i pèt an flèr ousa bonpé bann rézion L'UE i domann zot lindépandans konm ékzanp rézion Catalogne i vé kit L'Espagne minm avèk in vot po lindépandans L'Espagne i vé pa antann kozé (i vé tout dir po nou osi inn sékat si néna in mazorité i domand lindépandans larénion sra malizé po done anou) apré pa tro lontan sa L'Ecosse la osi bann Zanglé lé fé tout po pa i giny lindépandans é vèy lapankor fini na dot wa swiv wa fé dan in révolt rant bann zéta lérop é lafrans sra oblizé libèr zot bann dèrnié koloni osi i pé pèt in ti gèr mondial (lo gro si i ariv na pi riyin) tout lé bloké na pi riyin i rant Larénion ni larzan, ni manzé pars tout i sort an frans alor kosa lo pèp i fé li sa pa atann, nora in soulèvman lé sir wa fane dan tout bor batay ant domoun, batay ant kominoté, pars té abitié èt asisté kan lo vant lé vid i tyinbo pi bout, batay po konèt kisa i sa pran lo péi anmin minm sat té kont lindépandans zot wa sobat po prann lo péi anmin i fé pa pèr azot tout i pé arivé sé posa zordi minm fo zindépandantis i fé linité i arèt manz lo ki in na lot po komans organizé po travay ansanm (mèt nout diférans parkoté anon travay po lo pèp) po mèt anplas in program politik po prann anmin lo péi si malèr larivé akoz pa ''in gouvèrnnman préparasion lindépandans'' pa bézwin kont aryink si zélèksion si domin bèzman la pété lékip gouvèrnnman-là lé pré po défann inn révolt ou gèr an domoun isi Larénion sé posa mi di san in vot in zour larénion nora lindépandans apré dan la min kisa sa osi listwar wa koz po nou mé nou pé anpès sa tonb dan bann mové min si tout swit néna in lékip sèryé po organiz ''in gouvèrnnman préparasion lindépandans'' san violans mé dan lapé po prépar nout lindépandans san èt oblizé partisip bann zélèksion kolonial (zot wa di rèsponsab Zournal Démaliz lé fou ankor in komik i koné pa kozé i di ou i rèv kan warivé zour bann lang wa bat pé tèt mi war arpa mé nora wa maziné kan minm mon bann kozé). Mé i pé ariv osi lo pèp i désid swazi zoutiy zélèksion kolonial po domand lindépandans é la osi fowar si lafrans lé dakor po doné é i rèspèk vèrdik biro vot ??

Rédaksion Zournal Démaliz 

Fo démaladé nout sosiété

In zartik fé na in boutan sa bon lèktir azot ...

Si romèt pa ankoz dan systèm noulé dodan zordi po fini èk violans, viol, drog tout kalité zafèr lapo gangrinn nout sosiété é téroriz domoun san défans é bézwin zot trankilité kont pa sat i diriz anou po tir nout péi dann linsikirité nou viv dodan zordi séposa fo Larénion i pran anmin son dèstin po giny mèt anplas inn politik sikiritèr po lité podvréman kont tout kalité violans néna dan nout lavi toulézour. Si zordi dann sistèm départmantalis ousa nout sosiété lé maladé lé akoz lé in péi asisté, somaz for, domoun na pi ropèr, bann zèné lé an pèrdision, konsomasion sovaz sat néna i viv byin sat na pwin i ral gongon lamizèr tousala i fé in dékalaz nout sosiété i baskil dan in péi non drwa apré na bonpé zafèr po rowar andéor lo stati départman lé in not modèl sosiété anou minm rénioné maziné kosa nou vé po in Larénion ousa sakinn i rèspèk in na lot...
Rédaksion Zournal Démaliz 

mercredi 27 avril 2016

Zournal Démaliz i koz èk zot :

Koman ilé,


Bon lèktir azot tèrla dosi Zournal Démaliz

Gran mèrsi po tout sat i tyinbo ansanmavèk.

Zournal Démaliz 
Kozman po Démalizé :

In TAN po Maziné ????? 5 ?
Si tout rényoné zéne konm vié

i sava an frans kisa wa sobat ankor po nout péi ?

TANSYON PANGAR !
NOU lafine nir in Létranzé DAN NOUT Péi
Létan fé linité po Démaliz nout Téritwar dan lamin bann kolonialis

Rédaksion Zournal Démaliz