mardi 4 août 2015

Kozman po Démalizé èk Zournal Démaliz

Bann kozman po fé prann konsians, po maziné, po rouv lo zié, po fé avans zidé lakoz, po dénonsé é tout sat i fé sié anou dan lo sistèm kolonial nout péi lé dodan zordi...

* Tèrla i zwé pi kanèt i done po alé sat i giny pi swiv pran tizane tanbav...

* Tèrla néna lamour po ékri kréol

* Alon sov nout péi Larénion démay ali dann lamin bann départmantalis

* Larénion dirizé par mafia lokal, koripsion lokal,pistonaz lokal.
   Alé di partou lé gratui
                                             
* Kréol nout lang nasional rénioné
   Lapa in lang rézional
   Lapa in patoi
   Lé nout lang nasional kozé toulézour
   Par bann kréol rénioné

* Arèt tié nout péi èk béton

* Arèt aryink èk loto partou

* Si tout rénioné zéne konm vié i sava an frans kisa wa sobat po nout péi ?

* Rénioné lèr larivé po roprann nout péi anmin

* Nout lang koz ali, ékri ali, fé viv ali partou toultan

* Akoz ?
  Ou di oulé in militan i sobat po lidantité kréol rénioné mé soman ou vé out   marmay i aprann aryink lédikasion fransé é éropéanizé ?

* Tro bilingis lapo tinn nout lang kréol

* Nout Lang kréol in zarm po sobat kont-kolonialis

* Sobat po nout lang i rant partou : Dann télé, radio, lékol, biro, sobat po i rèspèk kisa ilé rénioné, i rèspèk nout lidantité, i rèspèk lo rénioné dan son péi.

* Kréol konm tout langkozé aprann po giny lir é ékrir

* I fo kontrol bann nésans po mié kontrol nout dévlopman

* Bann inndé mèr départmantalis i di fo èt fou po èt Mèr dan lo sistèm départmantalis

* Tout bann politikèr départmantalis i koné sistèm-là lapi bon akoz zot lapèr bordsa ?

* Sat i défann lo sistèm départmantalis i di fo domoun lé fou po fénésans zantropriz dan lo sistèm zordi

* Avan lo sistèm départmantalis té mi anplas nout péi té anvoy bonpé marsandiz andéor koméla i rant plis ke i anvoy

* Lé lo sistèm politik départmantalis la tié nout lékonomi

* Bann zène rénioné na pi travay dan zot péi

* Ladi fo anvoy tout nout zénès an frans apré kisa i débark isi larénion ?

* Sèl solision po bann politikèr départmantalis po lité kont somaz sé anvoy tout nout zénès andéor

* Dévidaz nout popilasion isi i arèt pi tard pa nou sra in létranzé dan nout péi

* Larénion lé Larénion, lafrans lé lafrans sakinn son mantalité

* Péi Larénion lapo krèv èk lo sistèm départmantalis

* Zélèksion Rézional fo bord ali na pi riyin po ginyé vot po bana sé kontinié ranpli zot pos

* Bann politikèr mantèr lé sorti po zélèksion Rézional 2015 sat i kont po zot lé zot lavnir po èd domoun atèr zot na riyin nafout. Alor domoun atèr bord azot kan zélèksion i ariv

* Bann Militan kiltirèl la larg lo kor lé fanafout

* Tout travay isi lé akaparé par bann domoun i sort andéor bann kréol i fé lo mor i bouz pa po zot péi lé kontan i ri an figir la mok

* In vré militan kiltirèl
   In vré konbatan la libèrté
   Lé kan i sobat po libèr son péi
   Lapa amaré èk lo sistèm départmantalis ilégal
   In kozé po fé prann konsians sat lapa konpri ankor
   kosa ilé in konbatan la libèrté

* Zournal Démaliz i koz si laktialité lavi toulézour lé in zournal kont-kolonialis é i sobat po ke bann rénioné i vé pran konsians po pran anmin zot destiné.

* Larzan lasistana lafrans la tié bann rénioné bordé la sosiété kolonial toulé lé 6 lo mwa bonpé rénioné lé alkolizé dan somin bann Bar lé rouvèr 24/24H po ansèv tyé lo pèp kolonizé atèr. Na pwin in politikèr i bouz po dénons sa. Sé sa zot i vé po lavnir nout péi.

* Lékol kolonial i fabrik somèr diplomé ou san diplom néna 260 000 marmay si ban lékol

* Tout bann média néna Larénion i défann lo sistèm départmantalis na pwin inn i sobat po ke nout péi i pran an min son destin

* Noulé Larénion nou na pwin in bout térin lé anou po viv dosi é pourtan lé nout tèr lé sat i sort andéor néna ziskakan na lès bana pran tout anon rovandik nout drwa po latèr po nou abit dosi nou poura pa aryink rès dann loyé, kazié lapin po angrès bann kolonizatèr fransé-rénioné. Latèr po rénioné

* Larénion in sèl pèp, in sèl nasion, péi tout koulèr. Lo rasis na pwin zot plas dan nout péi.

* Kan oulé indépandantis fo tout sat lé sou lo sistèm 974-Départmantaliéné fo dénonsé fo di lapa bon po nout péi é propoz nout prozé sat nou vé po Larénion.

* Tout bann parti politik i défann 974 sistèm départmantalis nou dwa dénons azot.

Dot wa nir apré...

Rédaksion Zournal Démaliz 


Po konèt :

Si zot i ropran lartik po fé konèt oubli pa di ousa i sort i kont si zot.

Rédaksyon Zournal Démaliz – http://zournal-demaliz.blogspot.com/