lundi 22 juin 2015

Diabèt i mèt dir dan nout péi

Lé vré fé kanpane é sann dann somin i fo fé po di ke Diabèt lé for Larénion é i fo ke bann Rénioné i sanz zot manièr manzé é rès pa tro sirplas, Mé sat i diriz anou dan lo koté santé piblik i di pa sé dopi nout péi la sanz son mod vi dopi la rant départman avèk bann konsomasion sovaz i fé manz nout popilasion tout kalité mové manzé é kondisione domoun san riyin fér i fé astèr Diabèt lapo tié nout santé isi èk dot maladi osi... i mèt dir isi Larénion an sanzan manièr manzé bann rénioné dopi la ni départman lané 1946 i fé koméla plipar domoun i fé pi in kont èk zot santé i manz ninport koman i fé pi atansion kosa zot i manz lé vré osi po sat na poin moiyin asté lo bon manzé bin kosa ou vé li ankor kap vèy son santé alor minm si sat i diriz anou i done zinfo lé anou osi rénioné pran an min nout manièr fé kuir manzé é gard kosa nout manz é komans par bord sat nou lé pa oblizé manzé, bana i di lé manz kréol lé rèsponsab osi non va nout manzé kréol lé kome tout kizine lé anou prépar san fé tro gra é pa mèt tro zépis é pa manz tro viand gra é i fo osi bouz lo kor pli souvan po tié dan nout kor bann mové manzé avan nout bann zansèt navé bitasion po transpiré é kaz la kour tout té manièl koméla néna kasié lapin, masine koman po sat na poin moiyin alé fé spor dan bann sal i tié la grès dan zot kor sirtou bann domoun azé. Sé po sa kan bana i fé kasié lapin ala in fason lité kont so maladi modèrnité nou lé dodan zordi kan i bati zimèb po domoun maléré obliz bann fésèr lozman mèt otour in parkour santé é akoz pa in sal gratuit bien organizé po domoun tout az fé spor ala osi in fason fénésans po done travay la zénès moiyin koman trouv larzan zidé moin néna i pé fé san kour dèryèr kontra san landomin i sifi nout tout néna la volonté partisipé minm maléré i pé fé in léfor pars i fo pa atann tout gratuit é rès dan lasistana.
I fo bann zinsdistriel i fé bann produi i arèt mèt tro sik dan zot ban produi po lité kont lo diabèt é lobésité
Po konèt : Néna isi zanviron 80 000 domoun lé pri èk lo maladi Diabèt é néna zanviron 250 i mor toulézan avèk sa.
Rédaksion Zournal Démaliz


Po konèt :

Si zot i ropran lartik po fé konèt oubli pa di ousa i sort i kont si zot.

Rédaksion Zournal Démaliz –  http://zournal-demaliz.blogspot.com/