samedi 13 juin 2015

Bann zonm abizèr si la mizèr sosial bann péi pov

Dopi lontan bann bononm rénioné i trouv pi fanm é sat i yème lo vis sexuel i sa va rod bann fanm Malgas la pli par lo tan po lo vis ou po maryé lé pli fasil po zot fé zot plézir akoz zot i trouv pi fanm isi Larénion pars ban fanm isi i rod lo bout na in pé i di osi akoz bann fanm malgas i done plis lo plézir zot i rod parapor bann fanm rénioné. Mé kan zot i sa va laba i sap pi konmsa i mèt lo grapin si tout zot néna i obliz azot maryé po giny tout sat néna é nasionalité fransé apré kan la fine giny sa i bord azot é lo pov bononm rénioné èk la ont i sa kasièt dan son péi mé la pa aryink rénioné néna osi bann zéropéin néna osi i sa va done tout zot larzan dan lo touris sexuel é sa gouvèrnnman fransé i koné mé i fèrm lo zié dosi.
Alor sré tan bann bononm rénioné i rouv lo zié po arèt tonb dann pièz mé néna i komans konprann astèr la pèr alé laba. Nou koné kan in péi lé dan la mizèr é na pi bann loi tout bann prédatèr sexuel i débark po anprofité mé fo pa akiz ke Madagaskar mé tout bann péi lé pov néna domoun i vien anprofité, si lo bann bononm rénioné i sa va plis sikoté Madagaskar pars lé pli pré po zot é fasil atrap bann fanm malgas pars bana i rèv in vi méyèr anou osi si nou vèy pa nout bann zéne fiy wa fini ariv parèy néna déza in pé mé sa lé kasièt domoun i an parl pa tro.
Inn sékat fodra lo pèp Madégaskar i ariv mèt anplas in gouvèrnnman i pran an min podbon po sortir zot péi dan la mizèr po fini èk lo tromatis la kolonizasion té lèsé par la frans kan Madagaskar la giny son lindépandans. Episa kansala gouvèrnnman kolonial fransé i mèt anplas inn loi po kondane bann domoun isi i sa va fé touris sexuel sikoté Madagaskar é dan lé zot péi po kondane azot ousa i ansèrv bann ti fiy andsou 18 tan.

Rédaksion Zournal Démaliz 

Po konèt :

Si zot i ropran lartik po fé konèt oubli pa di ousa i sort i kont si zot.

Rédaksyon Zournal Démaliz – http://zournal-demaliz.blogspot.com/