dimanche 22 mars 2020

Ankor in fwa rénioné lèr larivé po pran an min nout péi


Avèk malizé lépidémi noulé dodan zordi lé lindépandans nout péi na giny mèt anplas in nouvo sosiété é protèz nout popilasion dan nout prop lorganizasion é sanz konportman domoun dan bann kriz dan lo sistèm kolonial kapitalis nou wa lé grav désèrtin domoun dan sistèm-là i pans aryink zot tousèl. Alièrk zordi gèt zot minm dan lamaraz politik kolonial nout péi lé dodan èk lafrans sakfoi i ariv bann malizé é fo atann touzour in shèf kolonial po di kosa fo fé. Alor pli for ankor anou bann zindépandantis - kontkolonial alon kosté ansanm po libèr nout péi lo bann zoutiy lé anplas.

Lavnir é lèspoir po domin po zordi minm lé rozoinn Léta Rénioné lo bann zoutiy lé anplas lé anou ansèrv ali po nou fini èk sistinm mafia kolonial lé dan nout péi.

Ala bann zoutiy Léta Rénioné po zot konèt lé anplas dopi 2017

Sit Web Léta Rénioné  : http://www.kontkolonial.org 
Sit Web Gouvernman Kontkolonial  : http://gouvernman.kontkolonial.org 
Sit Web Gran Konsey Kontkolonial :  
http://gran-konsey.kontkolonial.org 
Sit Web Gran Lasanblé Kontkolonial :  
http://gran-lasanble.kontkolonial.org 

Rédaksion Zournal Démaliz – Mars lan 2020 - 
http://zournal-demaliz.blogspot.com/
https://www.facebook.com/Zournal-D%C3%A9maliz-492225557533691/ 

Po konèt :

Kopiaz roprodiksion intèrdi. 
Si zot i ropran lartik po fé konèt oubli pa di ousa i sort i kont si zot.

MANIRWAR ZOURNAL DEMALIZ DOSI LEPIDEMI COVID- 19 DANN KOLONI LARENION


Fotaspéré èk zot règloman-lwa kolonial té mi anplas kont lépidémi ( Covid-19 – Coronavirus) ranfernman domoun zot kaz po lit kont sa ke nora in rézilta pozitif vitman parse si bann ka i désanm pa é kontinié lès sat i sort an frans san i mèt azot an karantène dan in landroi sikirizé koté laréopor. Rénioné i giny arpa rès lontan anfèrmé é fodra trouv in not solision pars lo ranfèrnman i pé fé in léfé négatif si la santé é lagrésivité domoun - violans koupl é dot vis. Akoz la pa done sakinn in kit sanitèr (mask, gan, produi... apré vann in ti pri, problinm gouvèrnman kolonial fransé na poin avèk lobligasion kan domoun i sort dan somin port sa po zot asté komision (zis sa la bézoin po manzé), é dot zafèr inportan dan zot vi toulézour é i sort pa sakèstan dan la sominn é bann komèrs i doi pa rouv toulézour (lo dimans fo fèrmé) parkont intèrdi tout bann rasanbléman i atir la foul, pinik é dot zafèr lapa inportan, sikiriz bien sat lé oblizé travayé é kan i komans gro fénoir sat na poin riyin po fé na pi lo droi sort déor ziska bardzour, fo dézinfèk sakèstan partou bann zandroi na bonpé pasaz i fo édik lo pèp é fé prann konsians zoutiy i mank pa zot néna moiyin imin é larzan akoz toultan i fo fé la réprésion kolonial kisoi in bout papié èk zamand po fé konprann domoun minm sa bana i ékout pa é i pèy pa é néna minm la trap azot i giny arpa péyé dann sosiété kolonial noulé dodan tout lé bankalizé (gard zot minm lé parèy bann kontrol i fé toulézour kont lalkol, drog, vitès domoun i akout pa minm). Apré kan ou wa dopi la kriz zotorité kolonial i ariv minm pa done bann zoutiy la santé po protèz bann soinian i travay dan zot sèrvis la santé kisoi zinfirmié, zanbilansié, travayèr i okip bann domoun i abit zot kaz é dot. Bann rèsponsab la santé lé dépasé par ( Covid-19 – Coronavirus) dann koloni Larénion fodra L'ARS, gouvèrnèr préfé é lo bataklan zot in rannkont lo pèp po kontaminsaion nout péi zot na poin ont kontinié taz la gèl bann rénioné dan bann média kolonial.

Apré néna i di fo konfine tout domoun po lontan zot i kroir zot minm é nout popilasion wa giny tyinbo é asté manzé po lontan sak na moyin po zot la pa in traka. Si i dir bonpé tan i konfine minm oubli pa popilasion larénion néna bonpé lé atèr viv pi i sirvi minm pi tansion la kolèr i pèt podbon.


Parkont sat lé grav avan sa, si gouvèrnman kolonial fransé la vé pran bann mézir po protèz nout péi zordi sitiasion noré pa arivé i fo zot i rokoné zot défayans é rèsponsablité dann malizé zot la mèt lo pèp rénioné èk lépidémi falé fèrm laréopor é di bann touris po linstan i rant pi é mèt bann tout kalité domoun i débark an karantène (gard zot minm laréopor lé touzour rouvèr minm si zordi la komans prann in ti mézir mé domoun i kontini arivé wa kontinié anmin kontaminasion dan nout péi bann nouvo ka i arèt pi monté rèvèy azot rénioné po fé tak sa. Arèt pran lo pèp rénioné po kouyon ékout azot  fo ferm laréopor) fo kontinié kontrol tout bann bato i rant kisoi dan lo gran por é dann bann ti por la osi néna touris i débark. La pa lintéré larzan i doi pase avan lavi domoun é protèksion po nout popilasion kont viris-là lé in danzé po nout tout. Alor si lo viris i arèt pa zot wa kontinié konfiné fé tansion kolèr lo pèp fo bann gran zèspésialis i grouy zot kalbas po trouv i romèd vitman sinon pangar malèr po nout tout... 


Ala in vizion Zournal Démaliz i partaz èk zot apré nou sa pa di nou néna tout la solision sat lé ékri tèrla lé mèyèr, apré sakinn i pé aport in zidé koman organiz anou po nirbou andig viris-là... Ankor in foi Zournal Démaliz i di konfine nout popilasion tro lontan lapa in solision fo fé in dépistaz po tout domoun, san oubli lav la min é dot sikirité. Sinon wa fini par in kolèr lo pèp. Apré néna i di fo fé in konfinnman total néna i di la pa in solision lo mal lé déza fé si lo bann irèsponsab la vé fé zot travay nou péi noré poin bonpé ka ou pa ditou.


An tank koloni lafrans noulé mayé èk bann désizion bana sé zot i désid po nou si nou té indépandan nou noré pli fasilman kontrol é pran bann désizion vitman po protèz nout péi mé kan néna aryink bann shèf kolonial i di kosa fo fé noulé mal anbaré sé posa i fo lo pèp rénioné i pran an min son destin néna aryink lindépandans wa sov nout péi dan la ruine nou lé dodan zordi.

Rédaksion Zournal Démaliz – Mars lan 2020 - 
http://zournal-demaliz.blogspot.com/
https://www.facebook.com/Zournal-D%C3%A9maliz-492225557533691/ 

Po konèt :

Kopiaz roprodiksion intèrdi. 
Si zot i ropran lartik po fé konèt oubli pa di ousa i sort i kont si zot.