Alon Mèt ansanm po libèr nout péi

jeudi 27 avril 2017

Pèp rényoné dégob anou èk bann zélèksyon kolonyal

In kozé manirwar rèsponsab Zournal Démaliz dosi zélèksyon kolonyal prézidan fransé té fé dimans 23 avri 2017 dann nout péi okipé parbann kolonyalis fransé.
Zélèksyon kolonyal té fé dann nout péi okipé po prézidan lafrans lé san valèr po sat i artrouv azot dan lèspri po lindépandans Larényon. Astèr sat i artrouv azot dan lèspri lafrans èk lo makotaz bann parti politik dan nout péi okipé lé azot larg zot gro pléré antzot.
Sakinn astèr idwa swazi zot kan séposa fo bann vré zindépandantis é sat i artrouv pi azot dann systèm kolonyal i dobout po kapoune tout kalité kolonyalis néna dan nout péi lapo malprop nout péi èk zot bann parti é zidé politik inporté frans. Lèr lévé larivé po fé rèspèk anou.
Alor tousat i krwa dan in not manirwar Larényon Dimans 7 Mé 2017 Zélèksyon Kolonyal Dann Nout Péi Bord Ali
Rédaksyon Zournal Démaliz - In Not Manirwar Lavnir Larényon

mardi 25 avril 2017

Nouvèlté Larényon okipé par lafrans : Marine Le Pen i fé 23, 46 % dan nout péi : kisa lotèr !

Zourpozour, lané partsi lané, vot dosi vot, nout Péi Larényon i kontini anfonsé dan lindinité. Ala koman, Marine Le Pen lidèr Front National, in parti kolonyalis fransé ousa lapo fane zot manzé gaté dan nout péi, lafé 23,46% po zélèksyon kolonyal po prézidan fransé dan nout péi okipé. lé dann bann komine Tanpon, Pléne Dé Palmis, Sint Mari, Sin Bénwa, Sin Lwi, Lantré Dé, Sin Filip, Salazi é Latil la vot po Marine Le Pen.

Kisa ilé angro bann domoun la vot po lo Front National isi dan nout péi lé bann domoun atèr abandoné par lo systèm dopi lontan é fatigé èk bann parti tradisyonèl (droite / gauche ) ousa sak kou zélèksyon i taz zot gèl é bann zouvriyé, ti plantèr, ti zantropriz fatigé pèy tout zafèr èk in ti salèr alor po kri zot kolèr zot la mèt zot lam dan in Parti ke zot i krwar wa tir azot dan zot soufrans konbyin dan zot famiy ladi po zéléksyon-là i sa vot Le Pen pars zot i krwar i sar tir azot dan zot mizèr zot i rèv . Alor sat zot i koné pa lé in parti i fane lo rasis lo fasis lé danzéré po ladémokrasi inporté dan nout péi ousa zot pwindvizé kasyèt zot figir lo dyab an bondyé po anblouz domoun atèr. Non mon pèp rényoné Larényon lapa in téritwar po bann rasi fasis fo pa zot i fé malol azot èk bann zidé lo Front National péi Larényon i dwa rès ouvèr si lo mond é dan linité, létan fo nout tout i bord bann mouvman i sort andéor po fane zot vomi kolonyal dan nout péi séposa Zournal Démaliz i di po fini èk tousala i fo Lindépandans po Larényon vitman pars lé tro fasil atann aryink larzan lafrans mandoné fo lo pèp rényoné i pran in kou zot rèsponsabilté po bord tou bann kolonizatèr lapo diviz anou po zot giny pouwarkomandé.

Zyété dosi domoun bann komine la vot po lo front national la plipar lé bann komine-là néna bonpé délinkan, somaz, malizé sosyal, linsikirité é bonpé kominoté maoré akoz zot lé bordé dan zot kwinvi é abandoné par zot mèr é na pi riyin po zot dan zot lavi toulézour dan zot komine...

Rédaksyon Zournal Démaliz - In Not Manirwar Lavnir Larényon

mercredi 19 avril 2017

Rasanbléman kontkolonyalis

Ala in zinfo Zournal Démaliz i fé konèt azot.

TANSION PANGAR LARENION LEVE !!!
Bonpé lorganizasyon épisa LPLP (Lorganizasyon Po Libèr Nout Péi) i atann azot dovan préfèktir SinDni vandredi 21 avri 2017 9 vèr apartir.

Po dénons systèm kolonyal é po tyinbo ansanm Péi Giyane lé an lit.


Zournal Démaliz lé solidèr èk bana é bann Giyané.
Rédaksyon Zournal Démaliz

lundi 3 avril 2017

Zournal Fanal N° 14

Zournal Démaliz i fé konèt azot Zournal FANAL N° 14 Avri 2017. Louk ali andsou dosi zot paz...


Paz Fasbouk Fanal : https://fr-fr.facebook.com/fanalrun/

Rédaksyon Zournal Démaliz ''In Not Manirwar Lavnir Larényon''