mercredi 13 décembre 2017

Kominiké ZD

Tanto po zanviron in mwa Paz Facebook Zournal Démaliz sra dézaktivé par sikirité po rézon pèrsonèl i amiz arpa lontan parkont lo Blog sra ouvèr . Davans nou di azot in gayar 20 désanm – Fèt Kaf é in gayar fèt finn lané é nouvèl lan zot tout.

Mèrsibyin po zot konpliman.

Rédaksyon Zournal Démaliz

mercredi 6 décembre 2017

Gouvernman Kontkolonial

Zournal Démaliz ifé konèt azot Paz Twitter  Gouvernman Kontkolonial 

Pèz dosi lo Lien po louké : https://twitter.com/gouv_run



Rédaksyon Zournal Démaliz ''In Not Manirwar Lavnir Larényon''

jeudi 30 novembre 2017

Gouvernman Kontkolonial i sa domann in rokénésans Linyon Afrikinn

Ala in nouvèl po zot louké i sort dosi lo paz  https://www.facebook.com/gouv.run/ po zot konèt pèz dosi lo lien.

Rédaksyon Zournal Démaliz

Gouvernman Kontkolonial isa fé tout komifo po awar in rokonésans Linion Afrikinn #AUC po Léta rénioné nou la mèt dobout lo 5 novanm 2017. Nou baz anou su in Plan Stratézik banna lavé mèt an plass an Mé 2004 ousa té déklar #LaRénion sé in péi okipé par la Frans, sé in koloni. 

Kominiké Zournal Démaliz

Po zot konèt :

Koméla sra Zonas lo nouvo rèsponsab Zournal Démaliz. Mèrsibyin po zot tyinbo ansanm Démaliz.

Félix po Zournal Démaliz
Zonas nouvo rèsponsab Zournal Démaliz

dimanche 5 novembre 2017

Po zot konèt

Zournal Démaliz i fé konèt azot

Mèrsibyin po tousat té la po Lo Gran Lasanblé Kontkolonial dimans 5 novanm 2017. Po sat lapa giny nir sra po in not fwa.

Ala kisa la rant prézidan


Po lo Gran Lasanblé Kontkolonial lé : Fabrice ELISABETH


Po lo Gran Konsèy Kontkolonial lé : Félix CLAIN


Po lo shèf Gouvèrnnman Kontkolonial lé : Bernard GRONDIN


Nou nora lokazion done azot dot nouvèl tanto. Nou tyinbo


Félix prézidan Lo Gran Konsèy Kontkolonial é po lo Gran Lasanblé Kontkolonial é po lo Gouvèrnnman Kontkolonial.

mardi 31 octobre 2017

Gran Lasanblé kontkolonial po mèt dobout in Léta Rényoné

Lo komité éspésial ke la fénésans lo gran lasanblé kontkolonial lafé in kozé lindi 30 oktob 2017 sikoté Lo sid Larényon po fé konèt lo Gran Lasanblé Kontkolonial po mèt anplas lo Gran Konsèy Kontkolonial é lo Gouvèrnnman Kontkolonial wa tyinbo dimans 5 novanm 2017 sikoté Tanrouz – Lo Plat – Piton Sinlé 9 vèr matin ziska 4 trèr laprémidi. 



Bernard GRONDIN i di zidé mèt anplas in Gran Lasanblé kontkolonial léné lo 26 zanvyé 2017 kan li té konvoké dovan tribinal kolonyal Sinn-ni akoz li té vé pa pas konm ''Juré d'Assises'' tribinal Sinn-ni li lavé di bann kolonyalis antank dirèktèr Zournal Fanal é Port Parol mouvman indépandantis LPLP (Lorganizasyon Po Libèr nout Péi) lapa posib in militan kont kolonyalis ke i dénons zot sistinm kolonyal i vyin dann Tribinal kolonyal po sèrv zot zistis é alé kondane rényoné. Dann zizmanla li la giny in lamand ke li la rofiz péyé. apré kontak èk lantouraz bann zindépandantis, bann antikolonial, bann progrésis la désid mèt anplas in komité èspésial lo 25 mars 2017 ousa li sra dézinié lo portparol la komans travay dosi lo shart kontkolonial po di kosa lé bon po lavnir nout péi é koman i wa ali é la désid touswit fénésans lo gran lasanblé kontkolonial, gran konsèy kontkolonial, gouvèrnnman kontkolonial po dégrinn lo sistinm kolonyal dan nout péi, po défann bann rényoné lé krazé dan zot péi, po lité kont linzitis kolonyal é prépar inn konstitision, bann lwa é program po léta rénioné po domin bann rényoné i pran anmin zot péi é désid parnouminm é ponouminm po fini èk lo sistinm kolonial dan nout péi. Apré dan son kozé Bernard GRONDIN i di li noré pi fé tousala èk lo LPLP mé po tout i artrouv azot mèt anplas in gran konsèy kontkolonial té rasanb domoun ke i artrouv pa zot dann in mouvman politik li di lèr larivé po bann rényoné lé fatigé dann sistinm kolonyal départmantal pran zot rèsponsabilité na pi lèr po kalkilé vi lo sitiasion lo péi lé dann in trin i sava dirèktoman dan in mir dir i sa kraz tout. Avan i tyé tout li la pran anmin po mèt in not trin anplas po pa li mor avèk lo bann kolonyal départmantalis, pars li di bana i koné i giny pi fé aryin èk sistinm départman mé lé zot prop lintéré pèrsonèl i kont avan, fé anprofit zot famiy, lantouraz, fé la rolèv po zot prop kan i kontinyé aplik lo minm politik é kontinyé rasmas mantèr nout popilasion.

Po fini son kozé Bernard GRONDIN i di sitiasion nout péi lé dodan dan tout domène lé anfayit lé grav ke dèrnié kou zélèksyon 60 % domoun lapa voté alor kèl lézitime prézidan kolonyal lafrans néna ankor dan nout péi okipé. Li kont si zot po ni mèt ansanm po ropran anmin nout péi po dégrinn lo sistinm kolonyal.

Po konèt :
Lo komité èspésial ousa la mèt dobout lo gran lasanblé kontkolonial i atann zot tout dimans 5 novanm 2017 9 vèr apartir lao lo plat Sinlé kan zot i ariv la kroizé lo Plat Sinlé - Tèvlav suiv lo bann pano ziska kan zot i trouv bann lorganizatèr dosi bor somin. 
Aminn touzour in ti ban ou in ti sèz piknik si zot nana, sat i fo osi po mèt atèr po asiz é manzé. Oubli pa zot manzé, aminn dolo po bwar. Aminn touzour in ti palto dan léo défwa i fé fré. Si zot na kayanm ek Roulèr aminn ali po kraz inndé Maloya. 

Ala lo plan litinérèr po zot konèt ousa ilé : 



Po konèt dot zinfo alé dosi lo Paz évènnman Gran Lasanblé Kontkolonial po louké : https://www.facebook.com/events/168224257070130/

Zournal Démaliz é Félix i mèt ansanm osi po lo Gran Lasanblé Kontkolonial


Félix po Zournal Démaliz

lundi 30 octobre 2017

Gran Lasanblé Kontkolonial

Kozé èk la près zordi minm dan lo sid Larényon po prézant lo Gran Lasanblé Kontkolonial dimans 5 novanm 2017 sikoté lo Plat Sinlé https://www.facebook.com/lplprun/



Po zot konèt landrwa po nir lo Gran Lasanblé Kontkolonial Dimans 5 novanm 2017

TANSION PANGAR

Adié zot toute dalon, dan in sominn nou sra dan kartié lo Plat Sinlé shomin Tan Rouz. Nou donn azot 2-3 zinfo pratik po zour la : kan zot i ariv la kroizé lo Plate Sinlé - Tèvlav suiv lo bann pano ziska kan zot i trouv anou su bor shomin. Aminn touzour in ti ban ou in ti shèz piknik si zot nana, sat i fo osi po mèt atèr po asiz é manzé. Oubli pa zot manzé, aminn dolo po bwar. Aminn touzour in ti palto dan léo défwa i fé fré. Si zot na kayanm ek roulèr aminn ali. Dimans proshin nou atann azot po ansanm ékri listwar nout péi.

Kozé Bèrnard GRONDIN


lundi 25 septembre 2017

Kozman Fabris

Zournal Démaliz i fé konèt azot

Ala dé Kozman Fabris in Militan Kréol Rényoné kontkolonial i larg in kozé kosa ilé lo Gran Lasanblé Kontkolonial la anvoy po Zournal Démaliz.

Sé koué lo Gran Lasanblé Kontkolonial, é pokosa  i ansérv.
Lo Gran Lasanblé kontkolonial lé in rasanbléman domoun lé dann zasosiasion, koléktif, mouvman, lorganisasion, domoun gadianmb ke lé an akor ék la shart kontkolonial.
Lé bann domoun la, ke sera dan lo gran lasanblé, zot sra la pou aport zot pwindvi dosi kwék sé in rénioné é Larénion.
De par zot natir, se bann domoun-la i détyin inn parti la définision de Larénion é du rénioné.
Plis lo Gran Lasanblé Kontkolonial nora de pwindvi diféran é konplémantér mwin li nora d'angle mor dosi la définision de Larénion é du rénioné.
Sé se bann pwindvi diféran é konplémantér ke lo grand lasanblé la bézoin.
Donc si zot lé kapab adére a la shart kontkolonial é ke zot i vwa ke zot pwindvi i pé kontribié aport in vision san angl mor, alor ézit pa réklam zot plas dan lo Gran Lasanblé Kontkolonial.

Sé koué lo Gran Konséy Kontkolonial é a koué i sérv ?
Dan lo Gran konséy kontkolonial néna bann "Gran Konséyé".
Lo bann Gran konséyé wa sort du Gran Lasanblé Kontkolonial. Zot sera dézynié par zot lasosiasion, lorganisasion, mouvman, koléktif pou konpoz lo Gran Konséy Kontkolonial.
In moun tousél ke lé pa dan in group défini i pouré rant dan lo Gran Konséy Kontkolonial, selon bann kritér ke le Gran Konséy i devra définir.
Lo bann Gran Konséyé nora le devwar de fé in konstitision pou définir lo bann kontour La rénion é lo Rénioné.
Lo Gran Konséy nora la sharz de véy si lo travay lo gouvèrnnman lé konform la konstitision Larénion.
Lo bann Gran Konséyé nora lo dovwar de difiz lo bann bon réponse.
Lo bann Gran Konséyé sra lo garan de la définision d'in Rénioné é de Larénion.
Sé lo bann Gran Konséyé va définir kosa lé bon, kosa lé pa bon pou lo Rénioné é La rénion.
Donc si zot la adére a la shart kontkolonial é ke zot i vwa ke zot lé kapab travay dan in group pou konpoz lo Gran Konséy , alor ézit pa a dépoz zot kandidatir ék Eli Sinle dosi lo paz évènnman pou rant dan lo Gran Konséy Kontkolonial.

Fabris

Lien paz évènnman Gran Lasanblé Kontkolonial po louké  é mèt ansanm :

Zournal Démaliz i fé konèt azot : konba in Militan Kréol Rényoné kontkolonial Lalit kontkolonial po lindépandans nout péi Larényon


Zournal Démaliz i fé konèt azot : konba in Militan Kréol Rényoné kontkolonial Lalit kont kolonyal fé pété


jeudi 14 septembre 2017

Zournal Fanal N° 16 édisyon éspésyal léla

Zournal Démaliz i fé konèt azot Zournal FANAL N° 16 Sètanm 2017 in lédisyon spésyal po lo Gran Lasanblé Kontkolonial wa tyinbo Dimans 5 Novanm 2017 sikoté Tan Rouz – Lo Plat – Piton Sinlé. Anndanla nora tout bann Zinfo dosi lo Gran Lasanblé Kontkolonial. I atann zot tout po mèt ansanm .Gayar lèktir azot.

Louk ali andsou dosi zot Paz é fé konèt otour zot bann konésans. Mèrsibyin.


Paz Fasbouk Fanal  : https://fr-fr.facebook.com/fanalrun/

Rédaksyon Zournal Démaliz ''In Not Manirwar Lavnir Larényon''

samedi 9 septembre 2017

FANAL N°16 SETANM 2017 i ariv tanto

ZOURNAL INDEPANDANTIS RENIONE
FANAL N°16 SEPTEMBRE 2017
EDITION SPECIALE
(disponible en téléchargement en début de semaine)
Lékip Fanal



jeudi 31 août 2017

Paz évènnman Gran Lasanblé Kontkolonial

Ala lo paz évènnman Gran Lasanblé Kontkolonial po zot mèt ansanm. Zournal Démaliz i mèt ansanmavèk osi.

Zot lé fatigé èk lo systèm kolonyal dan nout péi alor vyin mèt ansanm po lo Gran Lasanblé Kontkolonial wa tyinbo Dimans 5 novanm 2017 – 9 vèr matin / 4 trèr laprémidi sikoté kartié Tan Rouz - Plat Sinlé sra in zourné istorik po nout péi po dégrinn systèm kolonyal fransé dan nout péi, po mèt dobout in léta rénioné. Alon mazine nout lavnir ponouminm parnouminm.

Tanto si zot i vé prann kontak èk lo bann lorganizatèr Zournal Démaliz wa done azot in mail po konèt plis dosi zourné-là.

Lien Gran Lasanblé Kontkolonial :

Rédaksyon Zournal Démaliz  - In Not Manirwar Lavnir Larényon

Shart Kontkolonial


Té dobout sanm lo mouvman indépandantis rénioné, zot lé invité po bann zasise la dékolonizasyon nout péi.


In Gran Lasanblé Kontkolonial, po mazinn nout lavnir parnouminm.
Toutsat lé dakor ek nout Shart Kontkolonial alon mèt ansanm, alon dégrinn lo sistinm kolonial.

Shart Kontkolonial : "Anou lo pèp, anou rénioné, nou rovandik nout léritaz, sat y prann an kont listwar lèsklavaz, ek la kolonizasion dopi 1663 ziska zordi. Anou manm bann zasosiasion, bann kolèktif, bann mouvman, bann lorganizasion y vanz po pa oubli nout listwar, nou konstat parnouminm, podvré, dan kèl malizé nout péi ilé dan tout dominn nout vi toulézour. Toutsala nou wa partou, toultan.

Tout lo bann problinm la finn ariv anou, akoz zot la anprofit su nou, la abiz su nou é tout lo bann mové zafèr la pa arèt tonm su nou é kraz anou, toutsala na in sèl rasinn, sé lo dominasion léta kolonial fransé la mèt an plas. Toutsala y tiyn pa kont nout kisanoulé.
Nout listwar lé méprizé la lèss ali dan fénwar la minm fé krwar li té ekzis pa, nout prop lèkzistans na pwin valèr po zot.

Apré in tralé zélèksion ek zot bann promès mantèr, lèr larivé po nou lèv dobout. Lo sèl zafèr y kont po nou, sé mazinn - parnouminm é ponouminm - nout lavnir ek sat nout bann zanfan, minm si bann kolonialis y arèt pa mèt la pèr si nou é manti ek nou.

Anou, domoun, zasosiasion, kolèktif, mouvman, lorganizasion, lo pèp rénioné, alon mèt ansanm - nout tout égal antnou - in vré lantouraz po armèt nout péi an lèr é protèz lavnir nout bann zanfan.
Alon kas la sinn é rant dann ron po mèt an plas in Gran Lasanblé Kontkolonial, in vré soubasman po domin, popilèr é po linité nout pèp.

Lo shart la y esplik kom y fo lo bann règloman lo Gran Lasanblé Kontkolonial, ke va travay po Larénion dan tout son diversité kiltirèl é dan tout son dimansion sosial é ékonomik, po fénésans in léta rénioné ek in Gran Konsey é in Gouvernman Kontkolonial.

Lo pwindvizé lo Gran Konsey Kontkolonial sé mèt an plas in konstitision po in léta rénioné, prépar la lwa po domin , sra li va vey ke léta rénioné y respèkt la lwa kom i fo.

Lo pwindvizé lo Gouvernman Kontkolonial sé prépar in program gouvernman po domin, aport son solidarité kan y fo, défann lo rénioné kont lo sistinm kolonial fransé, sé li nora la responsabilité ladministrasion kontkolonial, sé li nora la responsabilité protèz nout pèp, nout péi é nout bann zinstitision nou la mèt an plas kan y fo é kom y fo. Sé li va roprézant nout péi an déor.
Lo Gran Lasanblé Kontkolonial va ekzis podvré lo zour na mèt ali dobout nout tout ansanm. Lo bann moun sra la va roprézant swa zot minm, sinonsa zot bann zasosiasion, kolèktif, mouvman ek lorganizasion, y fo zot lé kontkolonial.

Po mèt ansanm kont lo kolonialis, lo promié zafèr po fé, sé vanz po nout kiltir, po in lavnir lib, zis é égal dan in sosièté ousa lékonomi lé po nou minm.

Kolonialis lé partou Larénion, dann la kaz, dann lékol, dann travay, dann ladministrasion.

Sé touzour bann maléré lé dan malizé, sak nou la bozwin pou viv lé tro shèr (dolo, kouran, manzé, linz, la kaz). An misouk, i obliz anou pran in manièr viv ek in lédikasion y sort déor, po nout famy, y tir responsabilité papa manman pou mèt plis si marmay. Y obliz anou viv pou ashté kom dan péi déor. Zinformasion dann télé lé mantèr épi i sava dan in sèl koté, piblisité i rèspek pa nout manièr war la vi, nout kisanoulé é li mèt touzour sat péi déor dan nout koko tèt. 

Bann program dan lédikasyion lékol i rod ryink ranpli la tèt marmay ek bann modèl kiltirèl é ékonomik, sat i konsern pa nou, sat lé pa bon po nou. Y rabès nout lang ek listwar nout péi. Bandna i mèt an lèr bann valèr lé kont natir, i mèt an lèr shakinn pou son shakinn. Zot i protèz pa sat lé atèr, azot minm y désid sat nou la bozwin sat lé bon po nou, lo méyèr lé touzour po zot. Nout mizik lé rabésé (dann radio, télé, zournal, internèt, dan tout kalité manifèstasion kiltirèl), nout fason dansé, nout fason kozé, nout fason ékrir, nout fason fé désin, nout bann tizanèr, nout patrimwan lé abandoné, nout bann pratik po lo respé nout bann zansèt (servis, lomaz zansèt, tout bann fèt rélizion) ek tout nout bann tradision (la pèsh, la shas, rod bwa sèk). Partou na makrotaz po in plas sinonsa in subvansion po fé lo fransé, tout lé tèt anba, na pi riyn y marsh, na pi riyn y rosanm anou.

An misouk bandna i rod pou défann anou planté po manzé, mont lantrepriz ek gran lizinn, i défann anou form nout bann zinn, y anpès azot trouv in vré travay dan zot péi, y anvoy azot lot koté la mèr po armèt domoun andéor travay nout plas. Makrotaz, préférans po mantalité gro kolon, la vi shèr y profit riynk po sat lé anlèr. 

Di sat nou ve bann zéli i fé pa in kont avèk, lo bann domoun i travay dann ladministrasion lé konplis é zot i di pa riyn osi.

Toutsat lé dakor ansanm tousala, alon sign lo shart kontkolonial é fé tout po fé respèkt ali.

dimanche 27 août 2017

GRAN LASANBLE KONTKOLONIAL

Zournal Démaliz i fé konèt azot é i tyinbo ansanm. Fé konèt otour zot...

Rédaksyon Zournal Démaliz  - In Not Manirwar Lavnir Larényon

Té dobout sanm lo mouvman indépandantis rénioné, zot lé invité po bann zasise la dékolonizasyon nout péi.
In Gran Lasanblé Kontkolonial, po mazinn nout lavnir parnouminm.



dimanche 20 août 2017

Zinfo Po zot konèt :

Tanto nora in ‘’Gran Lasanblé Kontkolonial’’ sra mi anplas po bann rényoné i pran anmin zot destin. Louk lo bann lien andsou po inform azot po la swit...

https://www.facebook.com/groups/485611344894537/permalink/1311247312330932/

https://www.facebook.com/eli.sinle/posts/1942296819378613


Rédaksyon Zournal Démaliz  - In Not Manirwar Lavnir Larényon

vendredi 28 juillet 2017

Bann nouvo migran i débark

Artik Po Lir ou Rolir …

Po fé arviv azot bann nouvèlté fine difizé po sat i koné ou lapa ankor lir. Alor gayar koudzyé lèktir azot é kontinyé tyinbo ansanm Zournal Démaliz lo tan dot nouvèl i ariv. Difizé lo 17 out 2015

Konm toulézan sak rantré lékol, Larényon i koné in mouvman popilasyon kiswa bann débarkman nouvo migran fonksyonèr ladmistrasyon kolonyal fransé, i sort an frans é dan lé zot bann koloni, é bann zansyin koloni lafrans, é dot zétranzé i ariv an poundiak po antrotyin ladministrasyon kolonyal fransé dan nout péi po amont bann marmay rényoné zot lédikasyon éropéanizé é fransizé é konm toulézan bonpé zéne rényoné é azé lé oblizé ou forsé ou i vé osi san èt konséyé kit zot péi po alé imigré sikoté péi lafrans, péi Kébèk é dan dot péi nou lé pa kont si lo rényoné i vé form ali ou viv andéor si i sava san èt forsé akoz pa mé fo néna in rotour osi kan lo rényoné lé formé i vé artournné na lo drwa awar osi in travay dan son péi mé gèt zordi lapa lo ka lé sat i sort andéor i akapar tout. Ala lo sityasyon nout péi lé dodan, i kontinyé dévid nout popilasyon lé né isi, po kolonizé èk dot nouvo kolonizatèr, ala lo méfé lo kolonyalis fransé fé zot propagand èk konplisité bann politikèr é rényoné i soutyin lo systèm départmantalis po bous lo zyé bann zène rényoné i di azot na pi lavnir dan zot péi po aprann é travay fo alé andéor é an rotour i fé débark in takon domoun andéor po prann la plas lo rényoné é nout tèr. Po konèt toulézan néna in takon migran i sort déor i ariv dan nout péi Larényon apré zot i instal azot po toultan, lé rantré lékol mwad Out néna plis, an rotour bann èspatriyé rényoné i rotourn an ti kantité é néna bonpé i giny minm pi artourné po war zot famiy. Zot wa di lé normal bann domoun-là na lo drwa rantré pars Larényon lé in départman fransé lé normal kan ou réklam èt fransé mé po bann Patriyot Rényoné i sobat kont-kolonyalis fransé lé zot drwa é dowar dénons sa po bord systèm-là, é sré tan dobout po arèt lès dévid nout péi é modifyé nout popilasyon, ziskakan na rès dan lo désépwar é lès lo systèm kolonyal tyé anou. Fo pa nou lapèr pran nout destin anmin é atann tout èk lafrans rès kome noulé inn sékat nout sra étranzé dan nout prop péi é sa minm kolonyalis fransé la po fé dévid nout popilasyon po myé komandé alor démaliz anou avan lé tro tar. Po konèt konm toultan nou di si Zournal Démaliz po bann rényoné i défann lo systèm départmantalis i vé pa larg lafrans pars zot lapèr nora pi lavi fasil é fasilité larzan sé posa po sat i sobat po in péi tanou minm nou lé fane fané sakinn dan son kwin kontinyé maroné, rézisté po fé prann konsyans domoun si lo kolonizasyon nout péi..

Rédaksyon Zournal Démaliz – ''In Not Manirwar Lavnir Larényon''


Po konèt :

Si zot i ropran lartik po fé konèt oubli pa di ousa i sort i kont si zot.

Rédaksyon Zournal Démaliz – ''In Not Manirwar Lavnir Larényon'' http://zournal-demaliz.blogspot.com/

mercredi 26 juillet 2017

Démaliz i réponn azot

Bonpé i domann akoz Démaliz i mont pa in mouvman indépandantis po linstan i profèr rès konm ilé. Mé zot kozé lé an mazinasyon lé posib osi Zournal Démaliz i pé doman azot si inn sékat néna in groupaz domoun i sobat kont kolonyalis i mèt dobout in mouvman fé konèt azot si zot i vé mèt ansanm Zournal Démaliz wa tyinbo azot informé. Mèrsibyin kan minm po zot propozisyon mèt anplas in mouvman politik.

Rédaksyon Zournal Démaliz  - In Not Manirwar Lavnir Larényon

Démaliz i koz èk zot

Mèrsibyin azot osi sat i tyinbo èk lo Paz Fasbouk Zournal Démaliz https://www.facebook.com/Zournal-D%C3%A9maliz-492225557533691/ bèl konpliman po zot konfyans inkièt pa si na pwin tro nouvèl Démaliz i bouz ankor po lité po nout péi. 

Rédaksyon Zournal Démaliz  - In Not Manirwar Lavnir Larényon

Rapèl po zot konèt

Kisa ilé Démaliz ?

Zournal po dénonsé tout kalité linzistis néna dan nout péi é andéor, po fé prann konsyans pèp rényoné po in not manirwar lavnir Larényon kiswa politik kiltirèl é dot zafèr nout vi toulézour é lité kont lo systèm kolonyal i diriz anou...

Zournal fénésansé par in militan kontkolonial po lindépandans Larényon

Rédaksyon Zournal Démaliz  - In Not Manirwar Lavnir Larényon

samedi 22 juillet 2017

Kominiké Zournal Démaliz

Fé konèt antou partou bana

Zot ifé in kabar Maron kasyèt pi po zot kont pi dosi bann kanal zinfo kolonial anvoy po zot Zournal Démaliz sra largé gratuit po zot ala bwatmèl po kosté séré po fanefané zot ZINFO : zinfo.demaliz2015@gmail.com

Rédaksyon Zournal Démaliz -  '' In not manirwar Lavnir Larényon ''

Kartyé Tanpon

Zournal Démaliz ifé konèt azot Blog  ‘’Kartyé Tanpon’’ 

Pèz dosi lo Lien po louké : https://kartye-tanpon.blogspot.com/

Rédaksyon Zournal Démaliz ''In Not Manirwar Lavnir Larényon''

Mon Koudzyé Si Laktialité

Zournal Démaliz ifé konèt azot Paz Fasbouk  ‘’Mon Koudzyé Si Laktialité’’ 


Rédaksyon Zournal Démaliz ''In Not Manirwar Lavnir Larényon''

mardi 4 juillet 2017

Oté ti plantèr arèt anval la bav krapo bann kolonial

Kozman po bann ti plantèr kann lapo sobat na in bout tan po in ti moné po lopri tone kann èk bann zizinié kolonial i diriz nout péi mandoné fo arèt domand siouplé dann systèm makot nout péi lé dodan zordi. Oté ti plantèr bord bann larzan kolonial, sindika kolonial sèl solision po pran anmin bann zizine kann sra lindépandans wa sov zot métié nora pi bézoin bès kilot dovan bann gro zozo kapitalis kolonialis i sort andéor bana i pran azot po kouyon. Alor tank zot wa rès anmaré dan lo systèm kolonial zot sra toultan dann bèzman, dann malizé larzan, andété èk bann krédi bana la angant azot dodan. Pouwar larzan i dwa pa désid po nou, i dwa pa komand anou. Planté po nout manzé arèt angrés bann zizinié.

Ala in gayar tèks Défin Franswa Sintomèr la ékri po bann Plantèr zot i pé artrouv sa an mizik. Po ankouraz zot konba...

Plantèr

Plantèr po planté
Li lé kontan planté
Lèrk po zot péyé 
In ralé pousé

Mésyé dann biro klimatizé
La fine kalkilé
Koman li sar ralé
Plantèr dann malizé

La koup larivé
Bann kann nana borèr
Nou té toultan planter
Nou vé pi rant somèr

Mésyé dann biro klimatizé
La fine kalkilé
Koman li sar ralé
Plantèr dann malizé

Mésyé sindika oté
Li lé parti ‘’Paris’’
Koz èk gouvèrnnman fransé
Mizèr nou po pasé

Mésyé dann biro klimatizé
La fine kalkilé
Koman li sar ralé
Plantèr dann malizé

Toultan nou plant kann
Toultan nou lé planté
Kansa nou va konprann 
Planté po nou manzé

Rédaksyon Zournal Démaliz  - In Not Manirwar Lavnir Larényon 

dimanche 18 juin 2017

Zélèksyon kolonyal i aral pi

In kozé dosi zélèksyon kolonyal té fé dann nout péi okipé lo 11 é 18 zyin 2017 po dépité fransé. Gèt zordi forstan bann politikèr na lontan lapo taz la gèl bann domoun in gran mazorité lapa voté la désid fé in grèv po kri zot kolèr po zélèksyon-là alor i fé bann dépité la rantré té éli par inn minorité zélèktèr kèl lézitim zot néna kan in takon domoun i vot pi ala koman systèm politik kolonyalis fransé lé an fayit dan nout péi. 

Oté ! Kréol Rényoné lèr larivé po sat i krwa pi bann zélèksyon kolonyal alon daloné po mazine in not domin po nout péi andèor systèm kolonyalis départmantalis ousa na tro lontan lapo bord anou dan nout péi.

Rédaksyon Zournal Démaliz  - In Not Manirwar Lavnir Larényon  

mardi 6 juin 2017

Zournal Démaliz i fé konèt azot

Ala in kominiké Lorganizasyon Po Libèr Nout Péi (LPLP) dosi kolèr bann plantèr kann i sobat kont bann zizinyé po i argomant lopri tone kann. Louk lo lien zot Paz po konèt plis https://www.facebook.com/lplprun/photos/a.666738320038521.1073741826.122323141146711/1377609278951418/?type=3&theater



Paz Fasbouk LPLP : https://www.facebook.com/lplprun/

Rédasyon Zournal Démaliz ''In Not Maniwar Lavnir Larényon''

jeudi 1 juin 2017

In rapèl po zot konèt

Bonpé i domann Zournal Démaliz koman prann kontak èk bann rèsponsab LPLP (Lorganizasyon Po Libèr Nout Péi) ala lo gatir Paz Fasbouk LPLP : https://www.facebook.com/lplprun/ po kontak azot.
Rédaksyon Zournal Démaliz - In Not Manirwar Lavnir Larényon

jeudi 25 mai 2017

Zédi 25 mé 2017 : Zourné Lafrik

Drapo Linyon Afrikène (UA)

La zourné Lafrik i fèt lanivèrsèr bann lantant L’OUA (Organisation de L’unité Africaine) lo 25 mé 1963 zordi i apèl L’UA (Union Africaine). Lé in lokazyon po sak péi organiz in bouzé po pwindvizé fé rankont tout bann pèp Afrikin. Zourné-là normalman (lé in zour i travay pa dan tout bann péi i fé parti l’UA) lé zordi in zourné la fine nir in tradisyon ousa la pran rasine dan tout bann péi Afrikin, é lé in sinbol for po la lit po tout lo kontinan afrikin po zot libérasyon, é zot dévlopman dan tout domène mé na ankor bon pé travay po fé po ke lo kontinan Afrikin i pran tout son plas dan lo mond po fini èk la mizèr, la gèr, bann maladi é la dominasyon bann péi pli for é lèsplwatasyon zot risès é dot ankor.

Dan nout péi Larényon pourtan i fé parti lo kontinan Lafrik, zourné-la lé pa mi an valèr par bann zotorité kolonyal é tout kanal zinformasyon, mé sat lé fété par inndé zasosyasyon i sobat po mèt anlèr nout koté Afrikin. Zournal Démaliz i swèt tout bann rényoné in bon zourné po Lafrik po zédi 25 mé…

Rédaksyon Zournal Démaliz ''In Not Manirwar Lavnir Larényon''

dimanche 21 mai 2017

Zournal Fanal N° 15 édisyon éspésyal

Zournal Démaliz i fé konèt azot Zournal FANAL N° 15  2017 in lédisyon éspésyal ousa i rann omaz Jean Claude BARRET.

Louk ali andsou dosi zot paz...



Rédaksyon Zournal Démaliz ''In Not Manirwar Lavnir Larényon''